Indian advertising guru, Amul faknaa hmeichhe naupang lem siam chhuaktu, Sylvester daCunha chu a thi a, uitu leh suntu an tam hle.
daCunha hi Thawhlehni zan khan Mumbai khawpuiah a thi a; mahse, Amul chuan Nilaini khan a puang chauh thung.
Kum 1960 chho vela Amul girl campaign a duan chhuah avanga hriat hlawh niin he hmeichhe naupang cartoon lem hi tun thlengin dairy brand hian an mascot atan an la hmang ta reng a ni.
Khawthlang lam, Gujarat-a inbun, ni tin ei in mamawh siamtu, Amul hui khawvela bawnghnute siam chhuaktu lian ber pakhat a ni mek.
Nilaini khan Amul managing director Jayen Mehta chuan daCunha thih thu hi Twitter-ah a tar lang a, ‘Amul chhungkuain kan sunin kan ui tak zet a ni’ tiin a tar lang.
General marketing manager Pavan Singh chuan daCunha hi ‘legend of Indian advertising world’ tia sawiin ‘khawvela infakna daih rei ber’ a duan chhuah avangin a fak bawk.
“He fakna hian chhuan thar zel pawh a daih a, OOH (Out-of-home advertising) atangin print, TV a ni a, tunah digital leh social media thleng pawhin, a larin chhuan lo kal zelah pawh a thleng phak zel a ni,” a ti.
Politician, sumdawng leh infakna lama thawktute tam takin daCunha thi chu an ui thu Twitter-ah an tar lang hlawm.
Congress MP Sashi Tharoor chuan a thu hriatin a tihlungngaih thu a sawi a, “An era has passed. RIP,” tiin a tar lang.
Trinamool Congress politician, quiz master ni thin, Derek O’Brien Amul fakna zinga a duh ber tar langin, ‘daCunha hi a zahawmin mi tam tak hnena thu sawitu’ tiin a thlah.