India khawpui, Delhi-a five-star hotel-ah mi pakhat chu kum hnih dawn a man engmah pe lovin a thleng.
Delhi thlawhna tumhmun bul lawka awm, Roseate House-a an manager-te chuan he pa hi ni 603 zet engmah a man pe lovin a awm tih an hriat chhuah hnuah police hnenah an thlen.
A khualbik thlen man hi Rs. maktaduai 5 chuang zet a ni tawh.
Police hnena an thlen dan chuan he pa hian khualbuka thawk zinga mi chu a awm man thupsak turin a hmin niin ziah lan a ni a. Tun thlengin man an la awm lo thung.
May 24-ah daih tawh khan Delhi police hnenah thubuai thehluh a ni tawh a, tun hnaiah tual chhung chanchinbuah a darh ta chauh a ni.
A hming an tar lan loh mipa hi May 30, 2019 khan khualbukah hian zan khat riak turin a lut a, awm zui ta char charin January 22, 2022 thleng a awm zui ta niin Indian Express chanchinbu chuan a tar lang.
A man engmah a pe lo va, thawktu pakhat thawhpuiin a awm hun hi pawt sei zelin a awm man chu a thupsak zel nia sawi a ni.
Bumna an hman zingah hian mikhual awm ve dangte awm man (bill) nen an thleng kual vel thin bawk nia hriat a ni.
“Khualbukin dan a zamah chuan mikhual hian Rs. 50,000 chin chung lam bill a neih chuan dil tawh tur a ni a, staff-in a aia thu zawk hnenah thlenin pe ngei tura tih a ni a. Heng zawng zawng hi tuna mi lakah hi chuan tih a awm lo,” niin police officer pakhatin chanchinbu a hrilh.