Music industry leh khawvelpuma fan te te’n South Korean zaithiam lar tak Choi Sung-bong thi thut chu an sun hle a, kum 33 mi hi nimin piah khan a chenna Yeoksam-dong, Seoul-ah thi a hmuh niin, mahni intihlum ni ngei a hriat a ni.
Thuneitute sawi danin, lehkha hnuhnung hi hmuh a ni tawh a, thil awmzia an chhui chho nghal.
Choi Sung-bong hi Korea’s Got Talent, 2011 atang khan namen lova lar zuiin, a zai dan, thinlung leh tih takzeta a inlan dan te bakah dawhsana a khawsak vel dan te chu mipui thinlung a thleng phak tlat mai a, a thlekna piangah an thle dual dual a ni ber.
Lehkha hnuhnung?
A thih dan chungchangah thu inchuhna a nasa chho viau mai a, ama enkawl YouTube channel-ah note a upload te nen lama thuneitute chuan an la thutak hle a, tun dinhmuna an hmuhdan leh ngaihdan dik takah chuan ama thu ngeiin khawvel a chhuahsan, tih a ni.
Choi chuan a thih hma tuk maiah, “Ka tihsual pawi tak vanga tuarte zawng zawng lakah ngaihdam ka dil,” tih a ziak a, internet lamah hmuh leh chhiar theih turin a awm.
Hei hi cancer chi hrang hrang vanga hun khrih tak tawngbaw mek anga puhna dik lo tak rik chuah chuah hnu deuh maia thil thleng a ni a. Tin, sponsorship fund thahnem tak a dawn te chu dik lo leh fel lo takin a hmang niin, amah ngei a inpuang a, ngaihdam a dil nghe nghe.
Chu mai bakah donation a dawn zawng zawng te chu pekkir leh vek a tum thu thlengin a intiam bawk.
‘Korean Wave’ phenah?!
Choi Sung-bong thihna hi South Korean entertainment industry-a thil thleng vanduaithlak tak vawikhatna a ni reng reng lova. Rimawi leh lemchan khawvela power house ni chho mek leh korean wave tia khawvel mipuiin an buaipui luih luih karah thil vanduaithlak leh buaipuiawm tak a awm ve tho.
Heti anga larna leh hmingthanna phenah hian nunna thahnem tak a bo pil tawh a, a bik takin an ram thalaite’n an tuar nasa hle.
Kum 2014 daih tawha mipui ngaihdan lakkhawmnaah Korean thalai/tleirawi zahve aia tam hret te chuan mahin intihlum tumna an lo nei vek tawh a n awm e.
South Korea hi ram changkang zinga intihhlum tamna ber ram a ni mek.