Aizawl: MNF Thalai bultumin nimin khan Mizoram Hnam Runah MNF General Headquarters hnuaia frontal hrang hrang – MNYF, Ex-Mizo National Army, Mizo National Senior Front leh Mizo National Women Front-te an inkawm ho.
He hun kaihruaitu, MNF thalai President Dr L Thangmawia chuan lalna leh thuneihna hi Pathian ta a nih thu sawiin, “An sawi ang em em hian Chief Minister Zoramthanga hi dik lo nise Pathianin a chief minister-tir lo ang. Tuna kan kal dan en hian term thara kan sorkar leh sorkar loh hi kan kutah a awm a ni. Party atanga malsawmna dawn tum ringawt hi a fuh lo, Mizo hnam tana kan bei ang a, a malsawmna in min zui ang,” a ti.
Dr L Thangmawia chuan ZPM chu Mizo mipuite huaisen taka bumah puhin, “ZPM hian kohhran hi kan party a ni tih leh, unit din a ngai lo titute hian an tih loh tura an sawite hi an ti vek tawh a, party thenkhat candidate puan ruala buai tur an awm kan lo tih thin pawh a takin a rawn thleng ta mek a ni,” a ti a. ZPM hian candidate chang lo te tuam dam tur committee an din te hi party dangin an tih ngai loh a nih thu leh ZPM party Treasurer-in a awmna party show cause notice a pe te chu kalphung dangdai tak niin, ZPM chu an beih ngai lovin an mahni leh anmahni an inbei tawk tih a sawi.
He inkhawmhonaah hian resolution panga an pass a ni.
- Chief Minister Pu Zoramthanga kaihhruai Mizoram sorkarin sum harsatna namen lo kara ram hmasawnna leh himna tura hma a lakna hi lawmawm kan ti.
- Kum 2023 Mizoram inthlanpui lo awm turah MNF in sorkarna a chan leh ngei theihnan lungrual taka Pathian rawn chunga hmalak ho zel nise kan ti.
- Myanmar, Bangladesh leh Manipur tualchhung buaina avanga sahimna zawnga kan unau Mizoram a rawn tlanlut te Mizoram sorkar leh Zoram mipui ten kan lo tuamhlawm zel hi lawmawm kan ti a, kan unaute tana huaisen taka khawvel hriat a ding ngam Chief Minister Pu Zoramthanga kan chhuang tak zet a, kan unaute buaina leh harsatna ah chhawmdawl zel turin a tawp thlengin kan ding reng dawn a ni.
- UPSC Preliminary exam result chhuakah Mizoram atanga mi 12 inziak tling an awm hi lawmawm kan ti a. Thalaite hmasawnna tura kawng hrang hranga Mizoram sorkar hmalakna hian rah duhawm tak a chhuahzel kan beisei a ni.
- Ram tana kan rawngbawl pui Political Party dangte’n an chhungkua ah buaina nasa tak an tawh mek laia Pathian hruaina changa MNF in buaina tawk lova lungrual taka ke kan pen tlang zel hi lawmawm kan ti.