Nipa Barad leh Lalmuanpuii’n point 55 thawk chhuakin Luangmual tan kawng a awlsam a, Ningani tlai Pro Volleyball League-ah 3-1-in an elpui ber Kanan an hneh.
League-a sang ber nih inchuhin R. Dengthuama Indoor Stadium, Mualpuiah an inkhel a. Set khatna an hloh hnuah 23-25, 25-17, 25-12, 25-13-in Luangmual an chak.
Gujarat tleirawl Nipa chuan point 38 hmuin 12 a hloh a, D3 Business Player of the Match lawmman dawngin a kawppui 2019 Pro Volleyball player tha ber Muani’n vawi 17 vaw tlain tum nga a tisual.
Pro Volleyball-a an tel hmasak berah Luangmualin derthawng lovin an elpui team nga an hneh vek a. Inrinni zanah set hloh lova an hneh tawh leh league-a palina Bungkawn nen semifinal an khel ang.
Tun season-a trophy pahnih la tawh Kananin lungthu kim chunga kum khar an tumna leh a vawi khat nan Pro Volleyball champion nih an tumna a tla hniam ve thung a; June 26, thawhtanni zanah champion lai Bethlehem Vengthlang nen final luh an inchuh dawn a ni.
League khelh li chak zawn ve ve chungin kai thar Luangmual nen an intawng a, a tirah Lalramliani leh R Laltleipuii’n team tanpuiin inhnehtawk taka an inum hnuah 25-23-in an tlang.
Set an hloh hnuah Luangmual an insiam rem a, kum 18 mi Nipa leh Muani bakah awmze neiin Hmingthazuali a inlan a, inkhel an awpbet zui hneh hle. An ball vuak a nain a dik zawk bakah an kutthlak a inthlau a, net bulah hlauhawm bawkin Kanan player-ten an el zui pha lo.
Tleipuii’n point kua hmu mah se tum li a tisual a, Kanan tan mi mala thawh hlawh ber niin Rami’n tum sarih a vuak tlak laiin point ruk a paih. Tum dang angin thiamna tha an lantir thei lo va, hmasawn mamawhin khelmual an chhuahsan.