BJP party chuan India ram state tinah Social Media Influencers Meet hmang tura a tih angin nimin khan BJP Mizoram pawhin an party pisa-ah BJP Mizoram President Vanlalhmuaka hoin hun an hmang.
BJP party-in Social Media Influencers Meet an hman chhan sawiin Vanlalhmuaka chuan khawvel hi digital world a nih tawh avangin ram leh hnam hruaina kawngah social media hi hman tangkai tura inzirtir a pawimawh hle tih hriain, BJP chuan meet hi buatsaih a nih thu a sawi.
Vanlalhmuaka chuan social media hmangin mipui hi kawng dika a kaihhruai theih laiin, hman sual erawh chuan mipui a hruai kawi thei tih a sawi a. “Kan ram hmasawnna tur atan pawh social media hian nasa takin hna a thawk thei a; a tha zawnga kan hman thiam chuan kawng tam takin kan tangkaipui thei dawn a. A tha lo leh a ni lo zawnga kan hman palh erawh chuan thil pawi tak thlen thei a ni thung,” a ti.
Kumin kum tawpa MLA inthlanpui lo awm turah pawh hian social media-in nghawng nasa tak a neih a rin thu sawiin Vanlalhmuaka chuan a sawi a. Social media-ah dawt hrula party leh party inbeihna, thudik ni lem lo tute emaw ngaiha thudik anga lang thei tura inbeihna a awm theih avangin fimkhur a tul tih a sawi.
State Media Convener Johny Lalthanpuia kaihhruai inkhawmah hian State BJP IT & Social Media Convener Lalramdinfela Khiangte-in paper a present a. He hunah hian journalist-te leh YouTube Channel neitu thenkhatte an tel a ni.