Kum 1990s chho vela Asia khawmualpuia zaithiam lar ber tihngam, 2000s tir lam thleng pawha khawvel hriat lar ni bawk Coco Lee chu intihhlum tuma a beihna lamah nikhaw hre lova a awm hnuin a thi. Kum 48 mi a ni.
Hong Kong-a piang Lee hi a naupan laiin US-ah an chhungin an pem lut a, Mandarin (Chinese) leh English album hit tak tak a tichhuak.
Disney kutchhuak hit tak, ‘Mulan’ film-ah pawh khan ‘aw’ langsar ber thawhin, ‘Crouching Tiger, Hidden Dragon’ film lar taka a hlasak kha 2021 Oscar sem zanah a sachhuak leh bawk.
Kartawp lam khan Coco hi mahni intihhlum tumin a bei a, nikhawhre lovin a awmzui niin, a chhungte’nn an sawi.
Depression vangin tunhnai atang khan a talbuai zui viau a, hun harsa leh khirh tak tak a hmachhawn hnu ah Pathianni kalta khan a chenna In-ah intihhlum tumin a bei a, chhungte’n reng taka bawihsawmin Damdawi In an panpui. Ziaawm lam a pan thei lova, nilaini khan a thi.
Coco Lee hi a vanglai chuan rimawi khawvela zaithiam duhawm leh hriathlawh tak niin, ‘Before I Fall in Love’ a sak chu 1999 kuma Hollywood film lar em em mai, ‘Runaway Bride’ ah khan soundtrack pawimawh tak a ni a. Julia Roberts leh Richard Gere te an inlan.