Kawrthah leh Rengdil inkarah nimin zing dar 6:30 vel khan kuhva phur lirthei lian pahnih leh an kuhva phurh bag 120 a kang. Lirtheite hian Zamuang Police Check post an paltlang hnua kang a ni.
Kawrthah atanga thu dawn danin lirthei pahnihte hi Ashok Leyland ve ve niin, MZ-01/K-9510 hi a khalhtu leh neitu nia hriat, Lalramthara s/o Lalnunsanga, Maubawk leh MZ-01/K-9511, a khalhtu leh neitu nia hriat, C. Lalbiaktluanga s/o C. Lalrinawma, Falkland, Aizawl te an ni.
Kuhva bag 60 ve ve an phur a, bag khatah hian kg 80 a awm a ni.
Nilaini zan khan Hachhek Bial Kuhva Chingtu Pawl (HBKCP) leh kuhva chingtu mipuiin Zamuang kaltlang tur kuhva phur lirthei a kal thu an dawn chu anmahni kut zala la mai loin, Zamuang police check post-a duty-te ngaihchan phawt a, a ruka enthlatu (special duty) an insiam a ni.
Kuhva phur lirthei pahnihte hian zan dar 12 pelh hretah Zamuang check post chu thlengin police duty-ten check post-ah lo tiding mumal loin an lirthei registration number an en hnuah an kaltlangtir ta mai niin an sawi.
Hetia police duty-ten awlsam taka check post an paltlangtir hi hrethiam loin mipui thinur chuan kuhva phur lirtheite hi an umzui a, Zamuang leh Zawlnuam inkar kawng, km 2/3 velah an hruai let leh a. Hemi hnu zing dar 6:30 velah lirthei pahnih leh an kuhva phurh chu Kawrthah leh Rengdil inkarah a kang ta a ni.
HBKCP hruaitute chuan Zamuang police check post-a duty thin police zingah mipuiin an rin zawh loh an awm avanga special duty tur pawh a ruka an ruahman thu an sawi a. “Kuhva ro tawlh ruk avanga Hachhek mipuite harsatna sukiangtu a nih beiseia check post siam a nih dan leh mipuite hmakhua ngaihtuah lova mahni hmasial, mipui tana rintlak loh police an lo awm hi na an tiin, police fel tak tak kara hetiang lo tlazep hian police a tihmingchhia a, police-te lakah mipuiin rinna an hloh phah a ni,” an ti.
Kuhva chingtu mipuite hian dan phal loh kuhva man duh lotu police zingah ‘black list’ an nei tawh nia sawi bawkin, anmahni kutkawih ngei check post pawh mipui hian a sawisa nual nia thudawn a ni.
HBKCP chuan thil thlen dan ngaihtuahin police leh mipui inkarah inpuhmawhna fel lo tak awm thei a nih avangin thu belhchian dawl lo thehdarh lo tur leh fimkhur turin mipuite an ngen a ni.