Taliban-te chuan Afghan sorkar hnenah remna leh muanna chungchanga ruahmanna an siam chu ziakin thla leh hian thehluh an tum niin an pawl thupuangtu chuan a sawi.
Taliban hian Afghanistan ram hmun pawimawh hrang hrangte chu ram dang sipaiten an chhuahsan mek laiin hnehchhuh tumin hma an la chhunzawm mek zel.
Tun hnaia United States leh a thawhpuiten an hmunpui ber, Bagram Air Base an chhuahsan hnuah Taliban hovin ram an lak tak duai duai vangin Afghan rama venhimna thawktu sipai sang chuangin Tajikistan ramah an tlanchhe tawh tih Tajik border guard service chuan an sawi a. Sipai tam tak helho hian an man tawh bawk.
Afghan sipaite hnenah Bagram Air Base hi hlan a nih hnuah Taliban-te hian district hrang hrang an hnehchhuh nghal a, an hruaituten hun rei tak an lo thulhpui tawh remna zawnga inbiakna pawh kar hmasa khan Qatar khawpui, Doha-ah sorkar hotute nen inkawmna hun an hmang.
Taliban thupuangtu, Zabihullah Mujahid chuan Thawhtannia Reuters a hrilh danin tun atanga reilo teah inremna hi chak zawka kalpui a nih tur thu a sawi a, “Thil pawimawh zual tak tak an sawiho dawn a, a laimu ber chu remna kawnga inbiakna a ni,” a ti.
“Tunah hian indona mualah a chan tha zawk kan chang mek a, inbiakna leh inremna siam hi kan ngai thutak hle. Ziak thlapa inremna erawh thla khat vel lai a daih ka ring,” tiin a sawi bawk.
Tun hnaiah a punlun zawnga buaina a chhuah reng vang leh anmahni sorkar sipaiten an ram an chhuahsan vang hian US sorkarin a thlawp inremna chungchang hi mi tam tak ngaih a titha tawh lo.
Mahse, US State department thupuangtu chuan Afghanistan rama kum 40 chuang indona lo awm tawhah hian a tawp thlenna atan inbiak remna hi thil tih theih awmchhun a ni tiin a sawi.
Afghanistan ramah nawr luihna avanga sorkar thar a pian erawh chuan khawvelin an pawmpui ngai dawn lo tih a sawi a. “Sorkarin mihring nihna chanvo humhalh kawngah tha takin rorelna kalpui sela, chenna tlaknaah siam sela kan duh ber,” tiin a sawi bawk.
Taliban hian ram dang sipai inthiar chhuah mek laiin Afghanistan-ah hian hma thar an la nasa leh tawh hle a, buaina pawh a tam hle.