Russia-a thla hmasaa helna reilo te tichhuaktu, Wagner boss Yevgeny Prigozhin-a chu Belarus-a ni lovin, Russia-ah a la awm niin Belarus hruaituin a sawi.
An rama helna a chawh chhuah hnuah khan Prigozhin-a awmna chin hi hriat a ni lo.
A helna tihchhuah tihtawp a nih nana inremna siamah khan a laka thubuai siam theihna siam a ni lo vang a, Belarus-ah awm zui tura tih a ni.
Hetih lai hian Ningani khan Belarus hruaitu, Alexander Lukashenko chuan, “Prigozhin-a hi St Petersburg-ah a awm a, Belarus ram chhungah a awm lo,” a ti a ni.
Lukashenko-a hi a helna chawh chhuah tihtawp nana palai hna thawktu a ni a, chawlhkar khat liam taah khan Prigozhin-a pawhin Belarus a thleng niin a sawi.
BBC pawhin Prigozhin-a mi mal thlawhna an chhui zuinaah June thla tawpah khan Belarus a pan ngei niin an hria a; mahse, he mi ni tlaiah vek hian Russia-ah a let leh nghal.
He mi hnuah pawh hian a thlawhna hi St Petersburg leh Moscow inkarah vawi tam a thlawk leh tawh a; mahse, Prigozhin-a hi a chuang zel em tih hriat a ni lo va. Lukashenko-a’n an ramah Wagner hotupa a awm lo tia a sawi pawh hi finfiah a la ni lo.
Ningani khan Lukashenko-a hian ‘a hriat chinah’ chuan Wagner fighter-te hi an awmhmun pangngaiah an la awm vek niin a sawi a, heng zingah hian Ukraine khawchhak lam leh Russia-a Krasnodar region-a an training base pawh a tel.
Belarus hruaitu hian Wagner hotupa hi an indo thlawhna thenkhat pawh Belarus-a dah a phalsak a, hei hi an Nato thenawm ramte tihthaihna tura a ruahman ni pakhata ngaih a ni a, Soviet hun laia an sipai hmunte pawh hman theihin a la awm reng a ni.
“Mahse, Wagner hian thlirna dang an nei,” a ti a. “Engmah ka sawisak thei lo thung,” a ti.
“Tun dinhmunah erawh chuan an insawnna tur hi engmah tihfel a la ni lo,” a ti bawk.
Kum 1994 atanga Belarus hruaitu ni tawh, Lukashenko-a hian kum 2020 inthlanah khan vote a tichingpen nasa nia sawi a ni a. Wagner fighter-te zingah Belarus pan a la hmuh loh thu a sawi a, an ram lakah chuan ralthuam an lek a rin loh thu a sawi bawk.
Tun hnaia thlalem atanga thlalakah chuan Minsk bula sipai hmun hluiah puan in kaih thar a awm ngei tih a lang a; mahse, miin an luah tih hriatna tur hnuhma erawh hmuh a ni lo thung.