Covid-19 hri kai, a nupui anga insiama zin Indonesian pa chu thlawhnaa a thlawh laiin vansangah man a ni.
He pa hi a hming dik tak puan ni lovin DW tih chauhvin an sawi a, a hmai chu Muslim hmeichhiate tih angin a tuamna, niqab-in a tuam vek a ni.
A nupui passport leh Covid-19 a kai lo tih finfiahna lehkha a keng bawk.
Thlawhna a thlawh lai hian a inthlak a, mipa a ni tih a hriat tak avanga man chhuak an ni a. Inthlak lo sela chuan man a nih a rinawm loh va, a inthlaka mipa a lo nih tak avang hian stewardess chuan alarm a tiri ta a ni.
Airlines tam tak chuan July 19-a tan, Eidh al-Adha chawlhah zin veivah an phal lo nasa hle.
Police-te chuan thlawhna hi a tum veleh an lo hreng nghal chat a, hri a kai leh kai loh pawh an lo endik nghal bawk tih thuthar lakhawmtute hnenah an sawi.
Hri a kai tih hriat chhuah zui tak avangin an chenna inah inkhung tura tih nghal a ni.
Police-te hian a inkhung hran a zawha a dam veleh a chung thu ngaihtuah zui a nih tur thu an sawi bawk.
Hetianga an man hi Asia khawmualpuia tun hnaia hri kai an pun chak berna ram a nih thar leh tak avanga Indonesian thuneituten zin veivah khauh zawka an kalpui thar leh tak hnuah a ni.
Asia chhimchhak lam ramah hian ni khatah hri kai mi 50,000 vel hmuh ziah thin a ni.
Tun hnai hun eng emaw chen atang khan damdawi in an indaih lo nasa em em a, damdawi leh oxygen indaih lohna pawh a nasa hle.
Mi maktaduai thum dawnin hri an kai tawh a, mi 72,000 chuangin an thihpui tawh bawk.
Invenna damdawi pek chhuak a muang a, inkai awlsam tak, Delta variant-in a luhchilh zui leh bawk si avangin inkai an pung chak ta hle a ni.