Saudi Arabia club Al-Hilal chuan Kylian Mbappe nena inbiak phalna an nei a. Paris Saint-Germain forward hi Pound maktaduai 259 a lei an dilna a club in an pawm hnuah an indawr dawn.
Kum 24 mi France captain hian kum khat contract a la nei a. French champion hnenah hian ziah belh a tum tawh loh avangin Japan a pre-season tour an neih mekah pawh an hruai lo.
Club lam hian nakkum nipui a free transfer a chhuahtir ai chuan tun nipuiah man nei a hrlah an duh a, Al-Hilal sawmna hi a pawm a nih chuan khawvela player manto ber a ni thei dawn.
Paris Saint-Germain in kum 2017 a Pound maktaduai 200 a Barcelona atanga Neymar an lakluhna chu world record nilai a ni a. Mbappe hi hemi kum hian AS Monaco atangin Pound maktaduai 166 in la ve bawkin manto ber dawttu a la ni mek.
Mbappe hi a club lamin hralh an phal tih a darh hnu hian Europe club lian ten an ngaihven vek a, Real Madrid nen sawizawm niin a kal duhna ber niin a lang a. Nakkum nipuiah free transfer a insawn a tum niin sawi a ni tawh.
Hetihlai hian Chelsea, Manchester United, Tottenham, Inter Milan leh Barcelona te pawhin lakluh theihdan an ngaihven ve vek bawk niin an sawi tel.