Aizawl: ZPM Working President K Sapdanga chuan ZPM-in a thlawna sum sem an do tlat thu leh Mizoramah politics khelh dan thianghlim lantir an tum thu a sawi.
Nimina ZPM chhung inkhawmah thu sawiin K Sapdanga chuan kalphung thar an zawrh mek chu an khingpuit’n hrilhfiah thiam lo angin an puhna chu sawi fiahin, “Mizoramin ministry a neih tawha sorkar ding tawhten an lo neih ngai loh, an lo tih ngai loh kha ZPM party chuan danpuiah kalphung thar lian pui pui chi li kan dah,” a ti.
K Sapdanga chuan kalphung thar chi li an dahah a hmasa berah chuan sorkarna an chang a nih chuan budget session hmasa berah kut hnathawktute khai chhuahna turin thlai thar leina tur sum budget-ah an dah dawn tih a sawi a. A bul tanna atan thlai chi li-ah an enchhin tur thu leh thlai dang chingtute pawh an hah thlawn loh dan tur ruahman hmaih a nih loh tur thu sawiin, “Hei hi Mizoram sorkar tan leh mipuite tan thil thar, kalphung thar a ni,” a ti.
ZPM a sorkar chuan thalaite bana kaih a, lehkha an thiam emaw, thiam lo emaw, mahni kea dinga nupui fanau chawmna tur thawhchhuah nei turin an ruahmanpui dawn tih a sawi a. Mi tinin an thiam zawng leh tui zawng eizawnna thawh an duh a, thenkhatin an ruahman thiam a, bul tanna sum an neih loh vangin tihngaihna hre lo, thenkhat chuan thawk peih mah se thawh tur ruahman dan pawh an thiam lo a, chutiang mite hlei hlei chu thawh tur ruahmanpui a, thawh bul tanna tur ngaihtuahsak chu an hna hmasa berah an ngaih thu a sawi.
K Sapdanga’n an sorkar chuan sorkar building leh sorkar luah building-ah state pawn atanga man to zawk, tlo lo zawk, thawleng leh hman hrehawm zawk aia Mizopa kut themthiam kutchhuak furniture-te, Mizonu tah parda te hman kan tum hman an tum tih a sawiin, “Mizoram tihhmasawnna tur sum tam tak state pawna luang chhuak hum hum kha ram chhung mistiri te leh puan tahtute kutah a lut tawh dawn tih mai a ni,” a ti.
Contract hna chu contractor kutah a kir leh dawn tih sawiin ZPM working president chuan, tun hnaiah contract-a thawh chi hna open tender chhuah a awm tawh lo a, a hmutu tur thlan sa vekin, ruling party worker-te kutah a lut fai ta vek a. Contract hna thawhna phenah MLA-te an biru thin tih a sawi a. ZPM hian thuneihna a chan chuan contract hna chu contractor kutah a kir leh ang a, sorkar engineer-ten an endik leh ang a, hlemhletna awm lo turin thuneituten fir takin an veng dawn niin a sawi.
Hun rei tak an lo hahpui tawh ZPM chu kalsan duh hial khawpa rilru na an nei chu vanduaithlak an tih thu a sawiin K Sapdanga chuan, “Ngaihdam kan tulna apiangah min ngaidam a, lo kir leh turin tih tak zetin kan sawm a, an lo kir leh thei ngang lo a nih pawhin, an remhriatna leh an taimakna te chawlhsan loin, an thlen chin chinah hlawhtlinna nei ngei turin duhsakna sang ber kan hlan,” a ti.