Indian eptu hruaitu, Rahul Gandhi chu mi tihhmingchhiat thubuaia thiam loh chantir a nih hnua a vawi khat nan parliament-ah a kir leh ta.
Congress party hruaitu hi March thlaa kum hnih lung in tang tura hrem a nih hnuah dan siamtu a nihna hi a chân a ni.
Ni hnih liam taa Supreme Court-in hremna a tawrh tur kalpui rih lo tura a tih hnuah Thawhtanni khan MP a ni zui leh a ni.
Congress hruaitute chuan a lawm nan parliament tualah a lawm nan au rualin chithlum an sem bawk.
Eptu party dang hruaitute pawhin parliament-a Gandhi-a a let leh hi an lawmpui hlawm.
Gandhi-a hi Kerala-a Wayanad bialah Congress party MP a ni.
Politics thlirtute chuan MP a ni leh thei hi eptu party 26 zet tanrualna, INDIA tan phurna siamtu a ni thei dawn niin an ngai a, nakuma ram inthlanpuiah pawh a chuh thei dawn a. Tangrual hian Prime Minister Narendra Modi-a kaihhruai BJP sorkar paih thlak an tum a ni.
Gandhi-a laka thubuai hi kum 2019 inthlana Modi tih hming a sawi nawmnah tia puhna a ni.
Hremna pek leh MP atanga paih hi eptu party tam takin an sawisel a, BJP-in beih an tumna hrim hrim niin an ngai a. BJP erawh chuan a nih loh thu leh dan ang thlapa thil kalpui a nih thu an sawi thung.
Kum 2019-a Karnataka inthlana a campaign-naah Gandhi-a hian, “Engvangin nge rukrute hian Modi tih hming an put zel mai? Nirav Modi, Lalit Modi, Narendra Modi,” tiin a sawi a ni.
Nirav Modi-a hi Indian diamond tycoon niin a tlan bo mek a, Lalit Modi-a hi Indian Premier League chief hlui niin cricket board-in cricket-a inhnamhnawih tawh miah lo tura an hrem mek a ni.
BJP hruaitu pakhat, Purnesh Modi-a’n Gandhi-a laka thubuai hi a thehluh niin a thu sawi hian Modi tih hming pu zawng zawng a tihmingchhia niin a puh a. Gandhi-a chuan ei rukna a sawina mai a nih thu leh tute mah a tihbik loh thu a sawi thung.
March thla khan Gujarat-a court-in thiam loh chantirin kum hnih tang turin a ti a. Kum 2013-a Supreme Court-in thu a lo chhuah tawh angin dan siamtu zinga kum hnih chin tang tura hremte chu annihna hlihsak tura a tih angin MP a nihna hlih zui a ni.
Hetih rual hian court hian court sang zawnga thlen theihna a pe a, July khan Gujarat High Court-in a thu thlen erawh a hnawlsak.
Zirtawpni khan Supreme Court hian hremna pek hi hman rih loh turin a ti ta a, trial court-in kum hnih tang tura a lo tih chhan chu a chhan a tha tawk lo tiin thu a rem a ni.
Hetih rual hian Congress hruaitu hi tun hnua a thu sawiah fimkhur tawh turin a ti bawk.