Mizoram tlawha zin, All India Congress Committee (AICC) hruaitute leh Central YMA hruaitute nimin khan an inkawm.
Tuikhuahtlanga Central YMA Office-a an inkawmnaah AICC hruaitute chuan Congress-in central leh Mizoramah sorkarna an chan chuan UCC leh Forest (Conservation) Amendment Act, 2023 chu hnam tlem zawk leh sakhaw dang tan a him loh avangin an thiat dawn a, an kalpui ve dawn lo tih an sawi a. Forest (Conservation) Amendment Bill, 2023 chu ram neitute tan a him lo va, mahni ramah pawh thunei thei loa awm chu mihring dikna leh chanvo palzutna nasa tak a nih avangin kalpui chi a nih loh thu an sawi.
AICC hruaitute chuan sakhaw tlem zawkte tana dan him lo, innekchep leh chimral tuma inrikrapna leh rawva taka sakhaw dang vuantute nghaisak hi Congress party a din tirh atanga a do tlat, tihreh a tum pawh a nih thu an sawi a. State leh central-ah Congress a sorkar chuan sakhaw dang nekchepna hi tireh tura hmalakna hmasa tur zinga mi a nih thu an sawi a. Hemi chungchangah Central YMA chu thlawp tura an tihluih loh thu leh sakhaw hrang hrangte leh hnam tlem zawkte tana an ngaihdan leh an dinna an lo hriatchian duh vang niin an sawi bawk.
Central YMA hruaitute pawhin ‘Ram leh Hnam humhalh’ a pawimawhzia sawiin hnam tlem zawk leh sakhaw dangte tana Congress party dinhmun leh an hmalakna an hriat thu an sawi a. BJP-in India ram an sawisak dan a pawizia leh Mizoram pawh a tuar mai thei dinhmuna ding an nih thu leh party mal anga thlawp an neih ngai loh thu an sawi.
An inkawmnaah hian AICC atangin union minister hlui, Bhakta Charan Das, AICC (i/c Mizoram); Sachin Rao, Observer for Mizoram AICC; Mathew Antony, Spokesperson, AICC leh MPCC atangin an GS (i/c AICC) C.S Thanga te an ni.