Aizawl: Mizoram Civil Service Association (MCSA) chuan nimin khan Aijal Club-ah general conference vawi 47-na an hmang a, khuallian Dy Chief Minister Tawnluia’n SEDP thawh hnihna first installment chu September thla chhunga pek chhuah hman tum a nih thu a sawi.
Tawnluia chuan sorkar flagship program SEDP an kalpui dan sawiin, Family Oriented SEDP Phase-1 kaltlangin chhungkaw 60,000-te tanpuina Rs. 50,000 an pek tawh thu te, Phase-2 first installment chhungkaw 60,000 tan September thla chhunga pek chhuah hman tum a nih thu a sawi.
Covid leng, raltlan tuamhlawm leh hriat lawk loh chhiatna dang thleng avangin sum leh pai thahnem tak sen ral a nih thu sawiin, hemi avang hian hmasawnna tura ruahmanna awmte duh angin a kalpui theih loh a, chuti chung chuan hnathawh theih hun chhungah erawh theihtawp chhuahin, sorkar hmalaknate a chhe lem lo tih a sawi.
Dy. CM chuan MCS-te chu ram neitu nihna thinlung pu tlat tur leh public service nihna zawnah mipuite rawngbawl hna thahnemngai taka thawk zel turin a fuih a, pawl thil thlente a tul anga bawhzui tum a nih thu a sawi a, an kal zelna turah duhsakna a hlan a, sum leh pai harsatna karah thawktu indaih lohna phuhru turin sorkarin tan a lak zel thu leh service tihchangtlun leh tihphuisui kawngah pawh ngaihtuahna a sen thu a sawi bawk.
Conference hi session thuma then niin, an member chatuan ram pan ta mi parukte sunna hun an hmang a, MCS officer thar 15-te lawmna hunte an hman bakah rorel inkhawm neiin, report hrang hrangte ngaihthlak a nih bakah pawl member IAS-a kaisangte lawmpuina thil pek hlan a ni bawk a ni.