Aizawl : Kolasib district huam chhunga Bairabi-a Civil Sub-Division thar chu nimin khan chief minister Zoramthanga’n a hawng.
SDO (C) hawnna hun neih zawha NF Railway Platform, Bairabi-a lawmnaah Zoramthanga hian sorkar chuan hmasawnna hnaah pawh inrelbawlna lamah ramin a mamawhte tihhlawhtlin zel a tum thu a sawi a. Tuna hawn thar tak chu a thar mai a la nih avangin tihhmasawn zelna tur tam tak a la awm thu leh, office building chu a tul ang zela department hrang hrang inbun ve theihna tur te, quarters tha zawkte mamawh a nih dawn thu a sawi.
Chief Minister chuan Pathian zarah hun thate an nei zel a nih chuan hmabak te pawh an thawk chho zel dawn a, Bairabi hi a pawimawh em avangin hripuiin a tuam lai pawhin a tihhmasawnna tur sum an dawng tha thawkhat hle tih a sawi a. Mamit atanga kalna tur kawngte, Zamuang leh Kolasib lam kawngte, Hailakandi lam kawngpuite leh Tlawnglui lian laka invenna te pawh hmalakna tam tak an neih thu a sawi.
Barabi in hma a sawn chhan pakhat chu bialtu MLA in hna a thawh that vang leh a inpekna vang a nih thu chief minister hian a sawi bawk.
He hunah hian khualzahawm bialtu MLA K Lalrinliana pawhin thu a sawi a ni.