Aizawl: Lunglei district-a Special Court (NDPS Act) Judge Rohlupuia chuan ruihhlo kawl avangin mi pali thiam loh a chantir.
August 23, 2023 khan Judge, Special Court (NDPS Act), Lunglei chuan Lalramdina, Lunglei Venglai leh Zothanpuia, Chanmari-I, Lunglei te chu thiam loh a chantir.
Thiam loh chantir an nih chhan hi February 14, 2023 chawhnu dar 1:40 khan Excise & Narcotics department chuan Lunglei Venglai-ah Lalramdina scooter khalh lai atangin khuh damdawi (Codein-based Cough Syrup) bur 320 a man a. A hnuah damdawi neitu Zothanpuia chuh an man leh a ni. NDPA Act hnuaiah thubuai ziah luh a ni.
Zothanpuia hi Lianhna Drugs Store, Chanmari Veng Lunglei hnuaia medical representative a ni a. Medical representative licence nei a nihna hmang dik lovin hetiang hian ruihhlo hi a khawih a, Lalramdina chu thurualpui atan a sawm ta a ni.
Medical representative licence a hman dik loh avang hian Court chuan thubuai chu Section 26(d)-ah thlak (alter)-in an chungchang a rel a. Lalramdina leh Zothanpuia te hian an thil tihsual an puan avang leh Court chuan an thiam lohna finfiahna tha tawk a hmuh avangin Lalramdina leh Zothanpuia te chu NDPS Act hnuaiah thiamloh chantir (convict)-in rim taka thawk chunga thla li ve ve tang tur leh Rs 80,000 ve ve chawi turin thiam loh a chan tir a. Pawisa chawi tur hi an neih loh chuan thla li dang an tan belh ang.
August 24, 2023 khan Rohlupuia, Judge, Special Court (NDPS Act), Lunglei chuan Suiliana, College Veng, Lawngtlai leh H. Lallianpuii, Bazar Veng, Lawngtlai te pawh ruihhlo khawih avangin thiam loh a chantir.
Thiam loh chantir an nih chhan chu, April 10, 2023 tlai dar 3:30 khan Venglai Lunglei-ah Suiliana hian a car khalh laiah khuh damdawi (codein based cough syrup) bur 1,497 a phurh vangin END chuan an man a. A thurualpui H. Lallianpuii pawh hemi zan dar 11 ah an man leh a ni. NDPS Act hnuaiah thubuai siamsak an ni.
H. Lallianpuii hi Lawngtlai Bazar vengah an makpa licence hmangin damdawi dawr a nei a, RT Daniels Pharmacy hnuaiah Medical Representative ni lai a ni bawk. Heng damdawite hi H. Lallianpuii’n Medical Representative a nihna hmang suala hralh a tum mek lai leh Suiliana chu Rs 6,000 hlawh turin a kenkual tir a ni.
Medical representative licence a hman dik loh avang hian Court chuan thubuai chu Section 26(d)-ah thlak (alter)-in an chungchang a rel a. An thiamloh thu an puan ve ve avang leh Court-in an thiam lohna finfiahna tha tawk a hmuh avangin Suiliana leh H. Lallianpuii te chu Section 26(d) of NDPS Act hnuaiah thiamloh chantir (convict)-in rim taka thawk chunga thla nga ve ve tang tur leh pawisa cheng 90,000 ve ve chawi turin thiam loh a chan tir a. Pawisa chawi tur hi an neih loh chuan thla kua (9) dang an tan belh ang.