Aizawl : Guwahati-a AYUSH Regional Review Meeting-ah Health Minister Dr. R. Lalthangliana chuan State Medicinal Plants Board hmalakna leh hmasawnna te a sawi.
Sorkar laipui Ministry of Ayush buatsaih, West Bengal leh hmar chhak state te tana Regoinal Review Meeting-ah hian Health Minister Dr R Lalthangliana chuan, State Medicinal Plants Board, Mizoram chuan research and development lamah nasa taka hma la in, Mizoram a ram hnim damdawi awm te zirchianna chu Mizoram University nen tangkawpin an lo nei tawh thin chu chhunzawm zel an tum thute, ram hnim damdawia hman thin riral mai tur leh vang tak tak thenkhatte chu humhalh a nih theih nan SMPB leh Krishi Vigyan Kendra, Dept. of Agriculture te chuan nursery-ah tihpun hna an thawh mek thute a sawi.
Dr R Lalthangliana chuan Mizoram chu ramngaw nei tha, hmarchhakah pawh bio-diversity nei tha ber pawl an nih avangin an ramhnim leh ramhmul te hi hmang tangkai tura tih tak taka tih chuan state economy thanna tur hmanraw pawimawh tak tur a ni. Hetianga ramhnim leh ramhmul damdawi siam chhuah nan hian Central lam hian kalphung te pawh thlak hret a tul a hriat thu a sawi a. AYUSH hospital din belh a, doctor te pawh tun aia tam zawk lak belhna turin a bik taka ruahmanna siam tha a tih thu a sawi.
He meeting-ah hian Assam chief minister Himanta Sarma pawhin thu a sawi bawk.