Manchester United in beisei angin bul an tan lova, insiamtha a kawng dik zawh an tum laiin an tan thil a kaltluang lo. Tunah an defender Luke Shaw chu tihrawl hliam a neih avangin hun engemaw chen a chawlh a ngai dawn.
United hian kum 28 mi left-back hi a hliam hi hrethiam chiang zawk turin an la enfiah mek a, mahse tun dinhmunah erawh kar engemaw zat a chawl dawn tiin an sawi a. Khawthlang lam chanchinbu thenkhatin kar 6 atanga kar 8 vel pawh a ni thei dawn niin an sawi.
A inhliam avang hian England in thla thar a Ukraine leh Scotland an hmachhawn hunah a tel ve thei dawn lo.
Manchester United hian Shaw inhliam vang hian tlarhnungah tunge an chhawr ang tih zawhna a awm mek. Left-back dang Tyrell Malacia chu pre-season a a inhliam avangin hun engemaw chen ani pawh la chawl tur a ni a. Shaw inhliam ni hian English defender Brandon Williams chu Championship club Ipswich Town hnenah loan in an kal tir.
Tun dinhmunah Erik ten Hag-a’n duhthlan tur a neih chu Portuguese full-back Diogo Dalot leh Alvaro Fernandez a ni a. Dalot hi right-back nimahsela mamawh anga left-back a khel thei a ni a. Rawlthar Fernandez chu beiseiawm viau mahse loan a chhuak tur anga sawi a ni mek bawk.
Manchester United hian inhliam avangin midfielder lakluh thar Mason Mount chu September thla chanve hma in an chhawr thei lo dawn bawk a. Striker thar Rasmus Hojlund erawhin karlehah training pangngai a zawm tawh ang.