Mizoram Premier League Season 10 khelh tan a ni a. Inkhel hmasa berah champion lai Chawnpui FC in chiang taka hnehna changin bul an tan.
Rajiv Gandhi Stadium-ah Zote Toyote MPL10 round 1 inkhel hmasa ber hi chhun dar 12-ah khelh a ni a. Coach thar hnuaiah Chawnpui FC in kaithar team Project Veng FC an hmachhawn.
Team pahnihte hi I-Day football-ah intum tawhin Chawnpui in 1-0 in Kolasib team hi an hneh.
Tun tumah Rindika Hmar pawlte hian I-Day semi-final an luh zawh loh avangin a tha thei ang bera bul tan an tum a. A ni khatnaah an hlawhtling.
Goal khung turin hun pawh an mamawh rei lo. Minute 3-naah Vanlalthanga’n goal a khung nghal a, minute 16-naah a khung belh leh bawk.
Minute 30-naah Chawnpui in penalty an chawi a, Andy Lalrinpuia’n Project Veng tan a khung.
Mahse Chawnpui in goal hnihin hma an hruai leh har lo. Minute 39-naah Lalbiaknia Royte chuan an goal thumna a khung a, second half-ah Lalhmangaihsanga’n an goal hnuhnung ber a khung.
Inkhel hnuhnung zawkah Aizawl FC leh Electric Veng FC te an inkhel a, 1-0 in I-League club an chak.
I-Day football ah Aizawl FC in team naupang Electric Veng lakah goal thum an khung tawh a. Zirtawpni chawhnu inkhelah erawh an inthlauhna a tam lo.
Aizawl FC tan tlarhma a rinrawl Lalrinzuala chu chakna goal khungtu niin minute 55-naah goal a khung a, a team point thum a hmuh pui.