Aizawl : Secretary, Disaster Management & Rehabilitation department K. Lalrinzuali’n Inrinni khan tunhnai ruahsurin Zobawk South NH 54 leimin leh Zotlang, Tourist Lodge panna kawng tlaniam te tlawhin a enfiah.
Zobawk South-a leitan bawr leh a huamchhunga NH 54 laih hna thawhnaah leimin liantham a awm a, leiminna chhak tlangah lei khi zau tak a awm bawk a, chu chuan leimin lian zawk a thlen theiin mihring nunna leh in leh lo leh bungrua tan pawh a hlauawm thu bakah leiminna zawna cheng chhungkaw pali an riah chhuah thu khawtlang hruaitu ten an sawi.
DM&R Secretary chuan leimin avanga harsatna liantham a thlen loh nan kawng siamtu NHIDCL leh EPC contractor te chu chak taka hma la tura a nawr tur thu a sawi a. Chhungkaw pali riak chhuak te pawh a theih anga chhawnmdawl an nih tur thu a sawi.
Zotlang Tourist Lodge, Lunglei panna kawng pawh Geoalogy & Mining mithiamte nen zirchianga ruahmanna mumal tak siam turin a chah a, thuneitu sang zawkah a lo bawhzui tur thu a sawi bawk.
DM&R Secretary hi Lunglei Bawrhsap Ramdinliani, Addl. DC Donny Lalruatsanga, SDO (S) Lalhlimpuii Ralte leh PWD hotu ten an tawiawm a, Zobawk South leh Zotlang-ah LMC Councilor te leh khawtlang hruaitu ten an lo dawngsawng a ni.