Aizawl: Mamit Truck Owner Association (MTOA) chuan sorkarin an thil phutte a la tihhlawhtlinsak mai theih loh avangin National Highway 108 dan chah chhunzawm zel an la tum.
August 21, 2023 atang khan Mamit-a lirthei hmanga eizawngte hian sorkarah thil phut hrang hrang neiin, MTOA hian an thil phut thenkhatah sorkar thuneitute nen inremna nei thei mah se, Mamit district-a kawngpui leh Teirei lei (Bailey bridge) thawmthat an ngiat avanga National Highway 108 an dan chah chu sorkar thuneitute nen inbe thin mah se, inremna an la neih theih loh avang kawngpui dan chah chhunzawm zel a la ni.
Hetih lai hian, kawngpui dan chah avanga mipui harsatna tawh sutkian a nih theih beisei avangin MTOA ten hmalakna an kalpui chu, Mamit khawpui chhunga pawl hrang hrangte chuan an thlawp thu an lo sawi tawh a ni.
Mamit khawpui chhunga sumdawnna atana hman lirthei neitute leh Sub-Headquarters YMA hruaitute pawhin kawngpui dan chungchang relin an lo thukhawm tawh a. An thutkhawm hnua thuchhuah an siamah chuan, August 24, 2023-a All Commercial Vehicles, Mamit leh Sub- Hqrs Y.M.A Mamit Joint Meeting chuan, Mamit Truck Owner Association leh Mamit Truck & Tipper Association ten road block an neih an thlawp tlat thu leh, vawiin thlenga an thil phutte tihlawhtling tura a mawhphurtu department ten an harsatna a hmun an la enpui lo chu chu mak an tiin, Mamit district mipui hmuhsitnaah an ngaih thu leh an thil phutte tihlawhtlin a nih hma chuan kawngpui dan chaha hmalakna kal tlangpui zel tha an tih thu an sawi a. Road block avanga harsatna tawk mipuite hriatthiam an ngen bawk.
Mamit Taxi Association pawhin thuchhuah siamin, he hmalakna (Road Block) hi an thlawp a ni tih lantir nan nimin atang khan an service an chawl lailawk a ni.