Health & Family Welfare Minister Dr. R. Lalthangliana’n Inrinni chawhnu khan North East Indira Gandhi Regional Institute of Health & Medical Science (NEIGRIHMS) Shillong a tlawh a, Zoram Medical College (ZMC) tihchangtlun dan tur hrang hrang an hotute a sawipui.
An inkawmnaah Dr R Lalthangliana chuan ZMC-a cardiology department tana doctor, nurse leh technician te tan a thlawna training tihsak tur te, ZMC-a department hrang hrangte tihchangtlun leh tihphuisui nan NEIGRIHMS thiamna a bikin training tawi ang chi lam an mamawh thu te a thlen.
Heng bakah hian minister chuan Mizoramin a neih loh critical care speciality – neurology, nephrology damlote NEIGRIHMS-a inentir tura kalte chu inenkalwna tha an dawn thin avangin leh doctor-ten an lo ngaihsak avangin lawmthu a sawi a. Chutih rualin, Mizoram atanga NEIGRIHMS pan damlo tam zawk chu mi harsa tak tak an nih thin avangin ngaihsak leh zual turin NEIGRIHMS thuneitu a ngen bawk.
NEIGRIHMS hotute pawhin health minister-in an mamawh leh a ngennate chu a theih ang anga hma an laksak tur thu a sawi.
He hunah hian NEIGRIHMS hotute hi an director, Prof. (Dr.) Nalin Mehta; Medical Superintendent Prof. (Dr.) C. Daniala leh thawktu dangte an tel a ni.