Zote Toyota Mizoram Premier League season 10 round 1-na Inrinni khan khelh zawh a ni a. Inkhel hmuhnawmah Chanmari FC in 4-3 in FC Venghnuai an hneh.
Rajiv Gandhi Stadium a chhun inkhelah nikum final khel Venghnuai in tum dang ang thovin football huaisen an khel a. Chanmari in an hlau bik lo.
Minute 23-naah Laltlanzova hmangin Chanmari in goal an khung hmasa. Hei hi minute 41-naah C. Ramdinmawia hmangin Venghnuai in an sut.
Halftime hma in Chanmari bawkin goal an khung. Lalrosanga Hrahsel chuan minute 46-naah goal a khung a, 2-1 in Chanmari FC in hma an hruai.
Second half-ah Chanmari FC in bul an tan tha. Striker thar Lalkhawpuimawia an chhawr tangkai a, ani a lo la hriam reng. Minute 60-naah goal a khung a, minute 72-naah Laltlanzova bawkin an goal li na a khung.
Mahse Venghnuai an ngawi reng bik lo. Penalty vawi hnih hlawhchhuakin Ramdinmawia chuan a khung ve ve. Chanmari chak dan a awlsam bik lo.
Chanmari in Zirtawpni chawhnuah Chhinga Veng FC an hmachhawn dawn a, FC Venghnuai in Ningani chawhnuah Chawnpui FC nen nikum final rematch an khel ang.
Inrinni inkhel hnuhnungah Mizoram Police leh Chhinga Veng FC inkhel tur an ni a. Nimahsela Chhinga Veng FC ten Match Commissioner hriattirna anga AIFF Pending Player Approval status an pek loh avangin MPL-10 Regulation Section C angin match cancel a ni a, MPL-10 Regulation C(6) angin Mizoram Police FC chu 3-0 a chak zawka puan an ni.