Zohnahthlak MLA leh CM Biren-a hnimhnai lo

Manipur-a Kuki-Zo MLA 10-te chuan Chief Minister N Biren Singh-a’n an inhnimhnai reng tho nia a sawi chu a nih loh thu an sawi.

MLA rualte hian May 3-a buaina a chhuah atang khan chief minister nena inbiakna engmah an neih tawh loh thu an sawi a, biak an tum bawk lo tih an sawi.

“Singh-a’n min bepawp tha reng anga a insawi hi Kuki-Zo-Hmar MLA leh mipuite inkara inhuatna chi a tumna mai a ni,” tiin thuchhuah intawm an siamah an tar lang.

MLA-te hian May 4-a Imphal-a chief minister chenna in atanga a haw lam mi sualten an zinga mi, Vungzagin Valte an sawisak chungchang pawh an thuchhuahah hian an tar lang a. ‘Vawiin thlengin chhui emaw, mi man emaw an la awm lo’ niin an sawi a. Tunah chuan Imphal chu Kuki-Zo mite tan chuan ‘thihna phairuam’ a chan hial tawh thu an sawi.

“Paramilitary force-te pawh an him chuang lo, Meira Paibi (Meitei hmeichhe pawl)-in an lo check tho. Kan sorkar quarters leh mi mal chenna inte chu mipuiin an rawk a, an beih a, an hal bawk,” an ti.

Kuki-Zo MLA-te hian remna leh muanna tluantling a awm theih nan chuan India Danpui hnuaia ‘inawpna hrem’ siam chu a pawimawh ber tih a sawi.

Hetih lai hian Kuki-Zo MLA zinga mi, BJP minister Nemcha Kipgen-i chuan Assembly Speaker Thokchom Satyabrata Singh hnenah lehkha thawnin August 29-a session-a a tel theih dawn loh thu leh chawlh dilna a thlen.

“May 3-a Manipur-a tharum thawhna a chhuah atang khan kei leh ka chhungte tan Imphal-a awm theih ngaihna a awm lo va. Tharum thawhna a thlen lai leh Imphal-a dan leh thupek kenkawhna dinhmun enin, ni khat awh session hi tel ngaihna a awm lo a ni…,” tiin a ziak.

Kipgen-i ang bawk hian Kuki-Zo MLA dangte pawh session-ah hian an tel a rinawm chiah lo.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427