Aizawl : Assam Rifles buatsaihin nimin khan Aizawl-ah Rozgar Mela/Job Fair huaihawt a ni a. Union Minister of State for Minority Affairs John barla chuan hmanpuiin, Central Armed Police Forces (CAPF) hrang hranga hna hmu tharte hnenah Appointment Letter a hlan.
2 AR Gajraj Hall-a hun hmanah hian John Barla chuan Mizorama Rozgar Mela hmannaa Central Armed Police Forces hnuaia hna hmu thar mi 68 te hnena appointment letter pek chhuah a ni thei chu chhinchhiah tlak a tih thu sawiin, hna hmu thar leh an chhungte a lawmpui thu a sawi a. India ram venhim leh ram tha ti chak tura bultanna a ni tih hria a, Prime Minister-in a ngaih pawimawh em em ram ralmuang leh him, chhung lam leh pawn lam buaina laka fihlim, hmasawn leh changkang siam kawnga pawimawh tak a nih thu a sawi.
Ram venhim leh rawngbawl hna thawk tura ke pen chhuak thalaite chhuanawm a tih thu sawiin John Barla chuan theihtawp chhuah turin a fuih a. Ram leh hnam ziarangte chhuang tur leh mawhphurhnate tha taka hlen tura chahin, sorkar laipui hnuaia hna hmu tharte chu thang tharte tana entawntlak leh chhuanawm nih tum tur leh appointment letter chu ram tana chhenfakawm tak ni tura an bultanna ni se a duh thu a sawi.