India-a Uttar Pradesh state thuneitute chuan tun hnaia a zitirtuin a zirlaite hnena an zirlaipui Muslim naupang beng tura a tih video darh kal zelah an sikul hi an khar.
Neha Public School hian ‘education department-in zirna inin a neih tur ang thil a nei lo’ tiin an khar tih thuneitute chuan an sawi.
An sikula zirlai zawng zawngte chu sorkar sikulah emaw, a bul hnai mi mal sikulah emaw an sawi dawn tih an sawi bawk.
Hetih lai hian a zirlaite hnena an zirlaipui kutthlak tura titu zirtirtu, Tripta Tyagi-i chuan NDTV news channel hnenah a chet danah ‘zahna’ a neih loh thu a hrilh.
Naupang chhungte chuan an nau hi a times table a dik loh vang ringawtin hetianga tih hi niin an sawi.
Muzaffarnagar district-a mi mal sikul liam lem lo takah hian Tyagi-i’n a zirlaite hnenah an zirlaipui, Muslim naupang kum sarih mi beng tura a ti lai video hi kar tawpah khan social media-ah nasa takin a darh a ni.
“Engati nge zawi tê-a i ben? Na deuhvin beng ta che,” tia zirlai a fuih ri pawh video-ah hian hriat theih a ni a, hetih lai hian an ben naupang tap ri pawh a lang bawk.
“A hnungah khan beng rawh… A hmai a sen tan e, na deuhvin a hnungzangah khan beng rawh,” a ti bawk.
Naupang pa hian he thil hi police-ah thlenin a fa chu sikul atangin a la chhuak nghal bawk a; mahse, engmah thubuai hlabuai a siam zui lo.
Social media-a video a darh hian mi tam tak a tithinrim nghal hle a, mi thenkhat chuan a na thei ang bera zirtirtu hremna pek an duh thu an tar lang hlawm.
Police pawhin Tyagi-i lakah hian thubuai an siam ngei a; mahse, an man lo. An puhna hi bail theih a ni hrim hrim bawk.
Pathianni khan education officer Shubham Shukla chuan thuneituten thil thleng kha an chhui thu a sawi.
Thuneitu sang pakhat chuan an sikulah hian light leh fan pawh a awm lo va, class chu mumala then a ni lo bawk tih Indian Express chanchinbu hnenah a hrilh.
An sikul an khar tak chungchangah erawh Tyagi-i hian engmah a sawi lo thung.
NDTV news channel-in an kawmnaah chuan a chet dan chu dik a tih thu a sawi a, sikulah chuan zirlai naupangte chu ‘thunun’ leh ‘hrem’ an ngai thin tih a sawi.
He thil thleng hian ram pum a luah a, eptu politician tam tak chuan ‘inhuatna thil’ niin an sawi a. Uttar Pradesh hi kum 2017 atang tawh khan Hindu nationalist BJP rorelna hmun a ni.
Eptu, Congress party MP Rahul Gandhi chuan BJP hian India ram pumah sakhuana avanga inrem lohna boruak a tivung niin a puh.
“Sual rilru pu lo naupangte hnenah pawh inen hranna chi tuhin hmun thianghlim, sikul thleng pawhin inhuatna bazarpuiah a chantir,” tiin X-ah a tar lang a. “Hetiang chiah hi BJP-in India ram kil tina a chhem alh mek a ni,” a ti.
June thlaa Prime Minister Narendra Modi-a’n US a tlawh tum khan chanchinbumite zawhna chhangin, ‘India-ah inenhrannain hmun a chang lo’ niin a sawi.
A tuartu mu thei lo
Muslim zirlai, a zirlaipuiten an ben hi a mu theih lo va, Pathianni khan Meerut-ah inentir tura hruai a ni tih a nu leh paten an sawi a; mahse, engmah harsatna lian erawh a awm lo niin an sawi bawk.
“A buai deuh va, Inrinni zan khan zankhuain a mu lo va, inentir turin Meerut kan pan ta a ni. Doctor chuan engmah a nih loh thu a lo sawi a, mi tam takin an zim a, chanchinbumite pawhin an be reng a, a buai a ni,” tiin pawl hnih zirlai pa hian PTI a hrilh.
Kutthlak tura thu petu, Tyagi-i nen an chhungkaw inkarah boruak tha lo a awm loh thu a sawi bawk.
Hetih lai hian Muzaffarnagar Basic Shiksha Adhikari (BSA) Shubham Shukla chuan naupang hi sorkar primary school-ah dah luh a ni dawn tih a sawi.
“A pa hian Neha Public School-a kaltir zel a duh tawh lo va, block education officer nena inbiain khuaa primary school-a kal a duh a. Thawhtanniah ziah luh a ni ang,” a ti.
Neha Public School-ah hian zirtirtu pathum awmin pawl khat atanga pawl nga thleng zirna a ni tih BSA chuan an sawi.
Shukla chuan education department-in Tyagi-i chungchang hi police-in an chhui hnu leh a chunga an chet lak dan azirin an ngaihtuah dawn tih a sawi.
BSA hian block education officer pawh Thawhtanni khan Neha Public School-ah hian kalin an zirlaite zinga zirna kalpui zel dan tur a ngaihtuahpui tih a sawi.