Tunlaia mizoramin kan buaipui leh media luahtu chu India ram parliament in dan a pass tak forest and biological amendment act 2023 hi a ni a. He dan hi ngaihtuah chian chuan keini mizote tan dan sakei tih loh rual a ni lova. He dan hian kan rama forest ram zawng zawng hi central thuhnuaiah a dah ta hmiah mai ti ila kan sawi sual awm love. A kip a kawia a dan chipchiar hi mipuiin kan hriat tak tak phei chuan zoram hi kan ram ani lo ti thin tan a na ngawih ngawih a. Kan ramah chuan thu kan nei tur ani awm tak a ni a. Mahse, engmah kan sawibuai ve theih hauh lohna tur dan chu pass ani ta rup mai a ni. Kan ram khawi laiah pawh central sawrkarin a tul a tih chuan defence emaw, hmasawnna engemaw chhuanlamin kan forest chu an thiat hmiah hmiah tawh mai dawn a. Ram dan anih tawh avangin state sawrkar emaw, mipuiin emaw sawi tur kan nei thei tawh lova. Kan thuneihna anih tawh tlat loh avangin an duh ang chu kan thlir liam a ngai tawh a ni. State thenkhat chuan he dan hi an hmang zui nghal chuk chuk bawk.
India rama political party lian ber rorel lai bjp hian an thupui ber chu India ram hi hlawm khat tha tak, one India a siam a ni a. Ngaihdan hran neuh neuh, sakhua leh hnam tenau neuh neuh ten an ngaihdan an sawi vena turah an ngai lova. Hlawm tha takin sakhaw pakhat hnuaiah ram inlungrual em em ni a hmasawnna lam hawia ke pen miah miah thei tura siam hi an tum ber a ni. Hemi atan hian hma pawh an la nasa reng a. India danpui lo duangtu ten India ram hi pangpar huan mawi taka pangpar chi hrang hrangin anmahni mawina theuh chhuaha an par vulna anga an lo sawi thin chu bjp hian a pawm ve lo tawp a. A tawi zawngin an nunze mila ram pum hi kaltir a, an duhzawng pangpar (lotus) chauh par tir hi an duh dan a ni.
Chu hmalakna atan chuan central atang hian hnam tenaute chimral an nih theihna tur dan an duang ta chat chat a. Hemi denchhena forest and biological act 2023 pawh hi rawn pawm ta an ni a. Keini hnam anga dinchhuah ve tumtute tan chuan an thil tum hi lo pawm ve chi awzawng anih loh avangin kan sawrkar chuan a do ta a. Aseembly house ah meuh opposition leh ruling party ten lungrual takin he dan duh lohna hi an pass ta ani reng a. Kan assembly house in he dan duh lohna an pass thei hi a lawmawm em em a. Kan ram min rawn neknaah chuan kan lungrualzia pawh an phochhuak chiang viau a ni.
Amaherawhchu he dan pass duhtute hi India ramah an la chak hle a. Nakum inthlanah pawh an chak leh lo ang tih sawi a har a. Keini India hmarchhaka mihring nuai 10 chuang awrh tan englai pawha inven ngai a ni tawh a. Engtinnge an lakah hian kan inven ang tih hi thupui berah kan neih a ngai a ni. A hmasa berin an party hi kan thinhrik a ngai a. Anmahni lam tichak tur hian ke kan pen chhin eih lo tur a ni. A dawt lehah chuan an party duhdan tawmpui tur hian kan political party te hian ke an pen tur ani lo bawk. An sangawizawn pui pawh hi kan duh tur ani lo. Min chimral duha hma la rengtute kut tichak a, anmahni sum leh pai it a an thuhnuaia lo kun party pawh hi kan thinhrik tur a ni.
Hnam tenaute chimral zawng nilova, hnam tenaute pawh lo kuahkhawm thin India ramah hian political party te hi tute nge tih pawh kan ngaihtuahnaah kan telh a ngai a. India rama awm kan nih angin central lam thuhnuaiah kan awm lo thei lova. Central a thunei tura kan duh party pawh helaia kan tihchak ve hian kan hma kan sial thiam ani ngei ang. Keimahni state chhung ro inrelna chauh ngaihtuah lova, pawn lama kan dinhmun tur thleng hian kan politics hian a huam vek ani tih hre bawk ang u.