- Thiantha leh rinchhan tlak neih i châk
Mangan ni a tanpuitu neih kan mamawh vek a. TV serial lar tak, ‘FRIENDS’ film atang khan hmangaihna leh inlaichinna chungchanga zirlai tha tak tak zirtur a awm a, harsatna a awmin a hun leh hmun pawh sawi lem lova min puih hreh lo tu tur hi mipa te aiin hmeichhiate hian an mamawh zual bik hle.
Sumdawng pakhat chuan, “I bul hnaia thian tha tak an awm chuan engmahin a tibuai thei lovang che. Engtik lai paw’n an veng reng thin dawn che a ni,” a ti a, chhungkhat laina hnaite ai mahin a chhawr tangkai zawk thu a sawi bawk
- ‘True Love’ i tawng châk ngawih ngawih
Awm khaw lo thin a ni emaw, fel tak a ni emaw hmei-chhia an nih phawt chuan thil pakhatah an lungrual tlang vek a, an duh em em bawk. Chu chu – ‘Fairytale’ ang deuha a tawpa hlim taka hun hman leh mumang ram a taka chantir hi a ni.
Cinderella nih an hreh lem lova, a chhan chu hmangaihna hian khawvel awm chhung chu hmun ralmuangah a hlankai thin vang a ni.
Kimtei chuan, “Thil pakhat, ka duh em em mai chu – ka nihna ang anga min hma-ngaih theitu tur hi a ni a. Ka ti tak tak, hetiang mihring hi i neih phawt chuan hringnun hi a mawi thar leh ngei ang. Mi tam tak chuan sum leh pai velah an buai a, mahse i hringnuna nangmah hma-ngaihtu tur an awm loh chuan awmze nei lo a ni tawp.”
“Tunah bialpa ka hmangaih leh min duh deuhtu ka nei a, thiante paw’n min thik ang reng hle a ni,” a ti. Hetia a sawi lai hian a bula awm ve Sangi chuan, “Engkim mai hi neih vek ka duh a, mahse thil pakhat thlan tur ni ta ang se, ‘Hmangaihna’ hi a ni ang,” tiin tawpkharna a siam.
- Hnathawhnaa thawhhlawk ber nih i châk
Engemaw meeting pawi-mawh leh thil tih tur tul bik a awm changa thiante leh bialpate nena hun hmanna tur ang chite pawh thulhleh nghal zung zung a, meeting-na vela idea tha tak tak vawrh chhuak thin hmeichhiate hi thil dang aia career ngaih pawimawh zawkte an ni a.
Model thangduang tak a hming tarlan duh lem lo chuan, “Ka tan chuan hnathawh hi ka tuina ber a ni a, hemi vang mai erawh chuan tute emaw tan ka remchang tawk hrih lo tihna a ni hran lo. Mahse, hna-thawhnaa tihthat hi min tihlimtu ber a la ni rih tlat si a ni,” a ti.
College zirlai pakhat pawhin, “Career tha tak i neih chuan pawisa a lo lut hnem anga, shopping leh thenrual kawm te mai bakah mahni bul hnaiah mifel tak takte an awm thin a, partner hlawhtling tak pawh neih theihna kawng a inhawng nghal a ni,” tiin inring tawk tak chungin a sawi.
- Chhungkaw duhawm tak din i châk
Tute hmangaih letna emaw kan beisei loh vek paw’n tute hmangaihna emaw va chhuh sak hi mihring nihphunga ban pawimawh tak a tling pha a, chumi hnu-a chhungkaw din chu hmeichhia tan phei chuan a hlu leh zual.
Filmstar pakhat chuan, “Ka tan chuan, inneihna duhawm tak aia thlakhlelh leh ngaih pawimawh hi ka nei lo. Tha taka chhungkaw din hi ka thil tum lian ber pawh a ni,” a ti..