Aizawl : Mizo Zirlai Pawl (MZP) General Headquarters, Aizawl buatsaihin nimin khan Aizawl-a ZO FEST lo hman tawhna hriatrengna lungphun chu MZP President hlui, School Education Minister Lalchhandama Ralte in khuallian niin a hawng.
MZP Conference Hall, Aizawl-a hriatrengna lungphun inkhawmah Lalchhandama Ralte chuan, ZO FEST chu Zo hnahthlak inpumkhatna Kut atana MZP in kut ropui leh hnam atana hlu a lo buatsaih chu a hlut takzet tih a sawi a. MZP President a nih laia buatsaih tan a nih vanga Aizawl-a ZO FEST tum thum – kum 2004, 2006 leh 2009 a hman tawhna hriatrengna lungphun hawngtu atana sawm a nih chu lawmawm a tih thu a sawi.
Khuallian chuan Zo hnahthlak inpumkhatna a ngaihpawimawh thu sawiin, MZP ngenna angin, an chenna buai avanga Mizoram rawn bel zirlaiten kum hloh lova zirna an chhunzawm zel theih nan sorkarin theihtawp a chhuah thu a sawi bawk.
He hunah hian Aizawl-a tum thum – kum 2004, 2006, leh 2009-a ZO FEST lo hman tawhnate hriatrengna lungphun pathum hawn a ni.