Zote Toyota Mizoram Premier League round 3 chu Thawhtanni khan khelh a ni a. Vawi hnih champion tawh Chanmari FC in league season bul an tan that chhunzawmin hnehna an chang a, Chhinga Veng FC 2-1 in an hneh.
1st Bn. MAP Ground Armed Vengah hian Chanmari in hnehna an chan avangin an match hmasa pathumah an chak vek a, league table chung berah an thu mek.
Chanmari FC tan lakluh thar Laldanmawia chuan minute 36-na leh 70-naah te goal a khung a. Chhinga Veng FC in Suanngaihmuana hmangin goal khat khung ve mahse khung belhna hun an nei tawh lo.
Inkhel hnuhnung zawkah Electric Veng FC leh Chawnpui FC te inkhelin 1-1 in an inhnehtawk.
Champion lai Chawnpui FC tan Lalramnunmawia chuan minute 22-naah goal a khung a, hei hi Samuel Lawmsiamkima chuan first half-ah Electric Veng FC tan a sut.
Chawnpui hian Zirtawpni ah Chanmari FC an hmachhawn leh dawn a, Electric Veng FC in Ningani hian Project Veng FC an khel ve thung ang.