US Open champion lai Carlos Alcaraz chuan semi-final a invaw kai a. A chetthat chu chhunzawmin German seeded number 12 Alexander Zverev a hneh.

Kum 20 mi Alcaraz hian a khingpui lakah hian break point vawi nga a neih chu a hmang tangkai vek a. Tihsual nei mang lova khel tluanin 6-3 6-2 6-4 in a chak a, Zverev-a’n chhanletna tur a nei lo.

Kuminah Alcaraz hi vawi thum champion tawh Djokovic nen final khel tura rinkai an ni a, Wimbledon final intum tawhin kumin New York a final ah pawh an pahnih hian inkhel hmuhnawm an lantir leh a beiseiawm viau.

Semi-final a luhna kawngah Alcaraz a che tha tluang a, Zverev lakah hian nidanga a inkhel tluk lo zawk mahse harsatna lian a nei chuang lo.

Hetihlai hian Zverev hian seeded number six Jannik Sinner nen an inkhel hautak lutuk chu a taksa in a tlin lo niin a ngaih theih a. Nikum lamah hliam avanga chawl rei a nih bawk avangin a fitness a la tha tawk lo.

Kum 26 mi hi set thumna khelh dawnin a mal ah hliam a neih avangin buaipui a ngai a, khel chhunzawm thei mahse a khingpui a tihthaih tak tak thei lo.

“Ka inkhelah ka lungawi a, harsatna ka nei tam lo. Ka chetthat tluan lai a ni a, tennis tha ka khel a, ka taksa pawh a fit tha a, rilru lamah pawh ka inpeih.” tiin Alcaraz chuan a chak hnuah a sawi a. A khingpui tur Medvedev hi July khan Wimbledon semi-final ah a hneh tawh.

Khua a lum

Seeded number three Daniil Medvedev chuan a hnampui Andrey Rublev chu 6-4 6-3 6-4 in a hneh a. Khawlum avanga inkhelh harsatna boruak karah hnehna a chang.

New York khawpui khaw lum lutuk avangin player pahnihte hi inkhelh laiin tuivawt leh vur te a deh an ngai a. Medvedev hian khawlum lutuk hnuaia inkhelh chu a hlauhawm theih thu a sawi hial.

“Hetiang dinhmun a inkhelh chu player pahnihin kan tuar a, kan tan inkhelh a harsa hle. Ball hmuh te a harsa vek a, ngaihruatna nena khelh ani pawhin a nei ve thovang.” tiin a sawi.