Zote Toyota Mizoram Premier League Season 10 round li na Ningani khan khelh a ni a. 1st Bn MAP Ground Armed Veng ah Electric Veng FC leh Chhinga Veng FC te an chak.
Inkhel hmasa zawkah Electric Veng FC in an hnehna hmasa ber ni turin Project Veng FC chu 2-1 in an hneh.
Kolasib khaw club hian an inkhel hmasa zawkah Police lakah point an hmu a, chak thei an ni. Player malkhai a thlirin team dangte anga langsar an nei lova, mahse an chakna chu an tanrual theihna a ni a. Team tha Police lakah an tlarhnung a nghet.
Electric Veng lakah pawh a hnung lam a nghet viau. Nimahsela halftime dawnah goal an chhuah a pawi.
Electric Veng in F Lalrammuana hmangin goal an khung a. Second half-ah Project Veng an insiamtha, a bikin counter-attack atangin an hlauhawm.
Minute 72-naah Project Veng in Jehova Lalthangsanga penalty khung hmangin an si phurh an sut.
Nimahsela a tawpah tang tluan zo lovin Thangrothuama chuan huntawp dawnah Electric Veng chakna goal a khung.
Inkhel hnuhnung zawkah Chhinga Veng FC leh FC Venghnuai an inkhel a, 2-0 in CVFC an chak.
Chhinga Veng tan A Vanlalremruata leh Suanngaihmuana ten halftime hma leh hnuah goal an khung ve ve a. 2-0 in hun pangngai an khelh zawh tawh hnuah Chhinga Veng in substitution an siamlaiin tihsual a awm a, player 12 khelmuala an awm avangin FC Venghnuai in khelmual an chhuahsan.
Venghnuai lamin chhunzawm duh lovin hun pangngai khelh zawh a nih tawh avangin Chhinga Veng hi 2-0 a chak a puan an ni.