Bial sariha bye-election neih vote chhiarah rorel lai, BJP leh eptu tangrual, INDIA chu bial thum ve ve lain an intluk tawk mek.
Heng bialah hian Thawhlehni khan mipuiten vote an thlak a, Zirtawpni khan vote tlate hi chhiar a ni.
Tlai dar 6:00 vel thleng khan BJP hian Tripura-a Dhanpur leh Boxanagar assembly bialah hnehna an chang a, Uttarakhand-a Bageswhar bial an la bawk.
Hetih lai hian eptu tangrualte hian Jharkhand-a Dumri, Kerala-a Puthupally leh West Bengal-a Dhugpuri bial an la bawk a. INDIA-a tel zinga mi, Samajwadi Party chuan Uttar Pradesh-a Ghosi bialah hma an hruai mek bawk.
Tripura-ah hian BJP candidate Tafajjal Hossain chu Boxanagar bialah tlingin tribal tamna, Dhanpur-ah Bindu Debnath chuan hnehna a chang bawk.
Uttarakhand-a Bageswhar-ah a tir lamah BJP candidate Parwati Dass chuan hma an hruai a, Congress party atanga chuhtu, Basant Kumar nena an inkar erawh a tlem hle a, vote 2,400 chuang awrhin a hneh.
Bageswhar bialah hian MLA vawi li lo ni tawh leh cabinet minister ni lai, Chandan Ram Das-a chu April thlaa a thih avangin a aiawh tur thlan hi a ngai a ni.
Kerala-a rorel lai, CPI(M) tan thil zahthlak thlengin Chandy Oommen-a kaihhruai Congress-UDF tangrual chuan Puthuppally bye-election-ah vote 36,000 chuangin hnehna an chang.
Congress thluakbur thin thi ta, Oommen Chandy-a fapa, Ommen-a tho hian vote tla chhiar round hmasa ber atanga hma hruaiin a tawp thlengin a khingpuiin a um phak lo hle tluan a ni.
Jharkhand Mukti Morcha (JMM) candidate Bebi Devi-i chuan Dumri assembly bial, Jharkhand-a Giridih district-ah hnehna changin All Jharkhand Students Union (AJSU) party-in an dintir, Yashoda Devi-i chu vote 17,000 chuangin a hneh.
Uttar Pradesh-ah Ghosi bial vawngtu ni lai, Dara Singh Chauhan chuan Samajwadi Party chhuahsanin MLA a nihna atang pawhin a bâng a. OBC hruaitu hi a party zawm thar, BJP hmingin inthlan hi a chuh zui lehnghal a; mahse, he chanchin ziah lai thleng hian a chhuahsan party-in an dintir, Sudhakar Singh lakah vote 35,000 chuangin a hnufual mek.
West Bengal-ah INDIA-tel party pahnih, Congress leh CPI(M) chu tangdunin Trinamool Congress (TMC) an khing a. BJP tamna, Dhugpuri bialah hian TMC atanga chuhtu, Nirmal Chandra Roy a dingchang thung a, Mamata Banerjee-i party-in bial an lak belh.
Bial sarih inthlan ziungah Dhanpur, Dhugpuri leh Bageshwar te hi BJP-in an thut thin a ni a. Ghosi hi Samajwadi Party bial ni lai niin Jharkhand-a bial hnih erawh JMM vawn a ni a. Tripura-a Boxanagar bial leh Kerala-a Puthupally bial chu CPM leh Congress vawn lai a ni ve thung.