Indonesia khawpui, Jakarta daia tan in tawt taka kangmei chhuakah mi 41 vel an thi.
Tangerang tan ina kangmei hi Nilaini zing khaw var hmaa chhuak a ni a, mi tang tam zawkte mut lai a ni.
Kangmei chhuahna, Block C-ah chu mi 40 tan theihna ni mah se mi tang 122 zet an awm.
Thi zingah hian mi tang ram dang mi, Portugal leh South Africa ram mite pawh an tel.
Indonesian Law & Human Rights Minister Yasonna Laoly chuan ram dang mi thite hi an ram embassy theuh hnenah an hriattir tawh thu a sawi.
Laoly chuan tan in block-a pindan eng emaw zat chu kalh a ni a, kangmei a chhuah hnuah chuan hawn ngaihna a awm tawh lo tih a sawi.
Tangte hi ruihhlo kaihhnawiha tang an ni deuh vek a, thi zinga pakhat erawh tualthah thubuai nei a ni a, pakhat pawh firfiaka chetna kaihhnawiha tang a ni.
Hliam tuar pawh tam tak an awm a, thenkhat chu ICU-ah an awm.
Kangmei chhuah chhanah hian electric kal sual puh a ni a, Indonesian correctional institution thupuangtu erawh chuan finfiahna erawh an la neih loh thu leh chhui mek a nih thu a sawi.
Tan in pumah hian mi 600 vel awm thei tur an ni a, mi 2,000 chuang mah an awm mek thung a, vengtu erawh 15 chauh an awm thung.
Indonesian tan inah hian mi tang an tam thei lutuk hi sawi a lo ni fo tawh thin.