CADC-a MNF MDC 16-ten ZPM zawm leh dawn lo, an MNF zui zel dawn

Chakma Autonomous District Council (CADC)-a sorkar lai MNF MDC 16-te chuan ZPM zawm tum mah se MNF party hruaitute nen indawrna an neih hnuah ZPM an zawm leh dawn lo a, MNF party-ah awm zui zel turin thuthlukna an siam.

CADC-a MNF Legislature Party Leader, Chief Executive Member (CEM) Rasik Mohan Chakma leh a thawhpui MDC 16-te chuan September 29, 2023 khan MNF party atangin bânna an theh lut a, ZPM zawm tumin thil an kalpui mek a, ZPM pawhin mi thar lawm luh programme duangin CADC-ah ZPM kaihhruai sorkar a piang tura ngaih a ni.

Hetihlai hian MNF party hruaitute leh MDC 16-te chu nimin khan darkar thum ngawt an inkawm a, MDC-te chuan ZPM zawm an tumna thu thulhin, MNF party-ah awm chhunzawm zel an rem ti a ni.

MNF adviser, Robert Romawia Royte, District Council & Minority Affairs Minister chuan nimin khan thuchah tichhuakin, MNF MDC 16-ten ZPM zawm an tum chu tha an ti lo a, MDC-te chu MNF party-ah awm zui se an duh avangin MNF president leh party hruaitu dangten hma an la vat tih a sawi a, nimin khan Rasik Mohan Chakma leh a thawhpuite chu darkar thum ngawt meeting an neihpui thuan MNF party-a awm zui zel turin thuthlukna an siam ta tih a sawi.

Robert-a chuan, “MDC 16-te hian Tuichawng biala MNF candidate a chak ngei theih nan tan lak an tum thute an sawi,” a ti a, hemi avang hian ZPM-in October 4-a ropui taka mi thar lawm luh inkhawm buatsaih an tum chu an hmang thei dawn ta lo tih a sawi a ni.

Kumin May thlaa CADC inthlanpuiah khan seat 20 awmna CADC-ah hian MNF chuan bial 10 lain BJP leh INC-ten seat nga ve ve an chang a. BJP leh INC atanga MNF thlâwptute nen CADC-ah hian Rashik Mohan Chakma kaihhruai MNF sorkar din a ni a; kumin May 25 khan CEM atan lakluh a ni.

Leave a Reply

error: Content is protected !!