Larsapin Gandhi Jayanti Exhibition hawng

Aizawl: Mahatma Gandhi piancham lawmna denchhena buatsaih, Gandhi Jayanti Exhibition chu nimin khan Mizoram larsap Dr Hari Babu Kambhampati chuan Circular Lawn, Raj Bhavan-ah a hawng.

Raj Bhavan Secretariat leh Department of Commerce & industries te tangkawpin an buatsaih exhibition hi ni thum chhung awh tur a ni a, Mizo thil siam hrang hrang phochhuah a ni.

Hawnna inkhawmah Larsap Dr Kambhampati chuan exhibition hi Mahatma Gandhi zirtirna zulin khawtual mi thil siam leh dehchhuahte ngaihhlut inzirtirna bakah khawtuala sumdawng leh kuthnathawktute chawikanna atana buatsaih a nih thu a sawi.

Mizoram chu state lian lo tak, mihring tlem bawk si a nih avangin industry lian pui pui din remchang lo mah se, tual chhunga thar chhuah leh in lamah an lo siam chhuah theih apiangte hi hlawk taka sumah chantir theih a nih thu sawiin, “He mi huanga eizawngte hi kan duhsak a, an thil siamte kan hlutsak a ngai a ni,” a ti.

Commerce & Industries department changtu minister, Dr R Lalthangliana chuan sumdawngte, a bikin handloom leh handicraft huanga hmalatute chu an thil siamteah an kuthnu a mam chho zel a, belhchian a dawl chho telh telh nia a hriat thu sawiin, tan la zual sauh sauh turin a fuih a. Mizo puan, kawr leh thawmhnaw te bakah handicraft huang kutthemthiamte thil siam chuan belhchian a dawl a nih phawt chuan a leituten sum tam zawk sengin an lei ngam reng tih a sawi.

Gandhi Jayanti Exhibition ang hi Raj Bhavan-in a buatsaih vawi khatna a ni a. He hunah hian a duh apiangte tan Raj Bhavan tlawhin a chhim theih a ni.

Tun tuma exhibition-ah hian dawr 62 a awm a, hengah hian handloom lam thil bakah kut themthiamna atanga siam chhuah thil tha tak tak, food processing unit atanga siam ei tur chi hrang hrang te, food court te bakah PM Viswakarma Yojana ngaihven duh te tana Help Desk te leh loan la duh te tana pan tur Help Desk te pawh chhawp chhuah a ni.

Leave a Reply

error: Content is protected !!