Osimhen-a’n Napoli-ah a ngheh thu a sawi

Napoli striker Victor Osimhen chuan club a ngainatna leh club tana a inpekna chu a tlahniam lo hrim hrim tih social media kaltlangin a sawi.

Tunhnaiah Napoli in an social media lamah Osimhen tihelna video an tihdarh avangin an inkar sawi zui a tam hle a. Osimhen-a agent hian dan anga hma lak thlengin club hi a vau.

Amah Osimhen hian social media ah Napoli nena an inkungkaihna awm ang awm zawng zawng chu a paih nghal vek bawk a, hei vang hian an pahnih inkarin sawi zui a hlawh zual.

“Kum 2020 a Naples khawpui pan ka thlang kha duhthlanna ka siam fuh zing ami a ni. Naples mipuite hian min pawm a, kan inkar tichhe tur hian tumahin thil an tih ka phal lo.”

“Naples mipuite thahnemngaihna leh inpekna hian ka thinlungah thil tam tak a sawi a, he club chhinchhiahna hi chhuang tak chungin ka inbel thin a, hei hi a danglam lovang.”

“Tunhnaia Naples mipuite puhna hi thil dik lo a ni.” tiin a sawi.

Leave a Reply

error: Content is protected !!