AS Roma in Serie A a kaithar club Frosinone lakah 2-0 in hnehna an chang a, manager Jose Mourinho chunga ‘pressure’ awm tan chu an su kiang rih.
Rome khaw club hian season bul an tan tha lova, Pathianni zana an result hi league a an chak vawi hnihna chauh a nih avangin an club chungchang hi chanchinbu lamah a ri nasa.
Stadio Olimpico a inkhelah Roma a zawm hnuah goal khung lama harsatna nei lo striker Romelu Lukaku chuan tun season a a goal li na a khung a. Minute 21-naah amah vengtu defender in tlan sanin a insiamrem a, an goal hmahruai a khung.
Frosinone hi an away inkhel hnuhnung 17 atang vawi khat chauh tlawm an ni a, mikhual team ni chunga khauh tak ni tura inrem thin an ni. An si phurh sut tuma an beihlaiin second half tawp dawn lamah Roma captain Lorenzo Pellegrini chuan freekick atanga ball kal chu an goal hnihna ni turin a khung.
Roma midfielder Paulo Dybala a tangkai leh viau a, Lukaku goal khung tur a siamsak bakah Pellegrini volley tura ball vawrhtu a ni.
Roma manager Mourinho chuan, “Team tha tak kan hnih avangin ka lawm. Serie B rawn kalsan team an ni a, an team-ah theihna sang tak a awm. Kan inkhelh dawna kan zirchiannaah an tha ka ti hle a, vawiinah pawh an kheltha hle.” tiin a khingpuite a fak a. “Vawiinah kan result chu engpawh nise kan tanrualna lantir a pawimawh a ni.” a ti.