Manchester United winger Antony chu tun kartawp atanga team training a zawm leh hnuah zanina Galatasaray nen an inkhelh hunah inkhel ve thei tur zingah a tel dawn.
Brazilian winger hi hmeichhe kutthlak chungchanga puhna a awm avangin September thla tir atang khan a la inkhel leh lova, team training pawh a zawm lo.
Antony hian amah puhna hi thu dik lo a nih thu a lo sawi fo tawh a. Brazil ah emaw United Kingdom-ah pawh man emaw thubuai siamsak a ni lo.
Tun kartawp khan UK-ah kir lehin Pathianni khan training a zawm a. Manager Erik ten Hag chuan inkhel tura inbuatsaih zingah a tel thu a sawi.
United hian tun season a inhliam avanga buaina an tawh chu a la kaltluang zel a. An defender Lisandro Martinez chu zai a nih dawn avangin kuminah an chhawr theih a beiseiawm tawh lo tih manager in a sawi chiang.
Ani bakah Aaron Wan-Bissaka, Luke Shaw leh Tyrell Malacia te an la chawl rei dawn bawk.