Faina hapta kan hmang mek a. Faina chungchanga mithiam leh mi ropui tak takte thusawi pawh chhiar tur a tamin ngaihthlak tur a tam hle. He faina hapta hi kumtin India hnampa Mahatma Gandhi piancham 2nd october ah kan hmang thin a. Hei hi a chhan chu amah Mahatma Gandhi kha ram hruaitu ropui leh hmasa anih vang mai nilovin, amah khan faina hi a atchilh a. Faina hi a thupui a. Faina hi independence tluk hiala pawimawh ani a ti hial a. A thusawi tam takah hian faina lam hi a sawi tel zel thin. Hetiang hi anih avangin a piancham faina beihpui thlak nana an hmang pawh hi a inhmeh hle.
Kan hnam hi pi peh pu atanga chuti taka faina lama sang kan ni lova. Amaherawhchu khawvel eng kan lo hmuh chhoh phak ve hnuah erawh hma kan sawn em em a. Kan ramchhunga thingtlang khua te phei chuan khaw fai lawmman te hial dawng khawpin an lo fai ta thung a. Kan thingtlang khuate phei chu zin vel nuam khawpin an lo fai ta. Ram pawn atanga hnamdang lo zinte phei chuan boruak nuam leh khawlai fai ringawt pawh hahipin an sawi tawh thin hial a ni.
Aizawl khawpui ber hi faina lamah kan la hniam em ni aw tih turin kan khawlaiah bawlhhlawh leh rimchhia kan la nei tam a. Kan khawlai kawrte phei chu ruah a lo sur hian kan inthupna pho lan ani ta thin a. Kawra tuihawkin kan thuhruk ni awm tak kawra bawlhhlawh a rawn lenchhuak a. Kan uih leh vung vung mai thin bawk. Khawpui hi a inti changkang ber emaw kan intih lai hian kan thingtlang khuate faina lamah kan tluk lo em em a. Aizawlah hian kum sawmthum sawmli vel kalta a kawrah bawlhhlawh paih rawh tih thin chu kan la hmang reng emaw tih turin kawr a bawlhhlawh paih duh mai mai kan la tam hle. Kan kawra bawlhhlawh paih mai kan ching hian keimahni thinlung taka fai lohna a rawn pholang a ni.. Veng keltil deuh lamah phei chuan ruahsur laia septic tank sah duh khawpa rilru hniam kan la awm fo a. Mahni septic tank ek kawra khawlut tura vuah duh mai thlengin kan la tam mai.
Kan bawlhhlawh paih dan tur sawrkar leh khawtlangin ruahmanna fel tak an siam a. Mi tamzawkin an zawm laiin faina ngaihthah zual kan la tam mai a. Ruahmanna awm sa pawh zawm nachang hre lo kan la tam viau.
Faina hi khawlaia intan tur ani lova. Kan thinlunga fai duhna kha a intanna tur zawk a ni a. Kan thinlunga fai duhna khan kan inchhung fai a thlen a. Kan inchhung fai khan kan in leh a chhehvel faina a hring chauh zawk a. Chuvangin kan khawchhung fai kan duh chuan keimahni thinlung a fai hmasak a ngai. Chu chauh chuan khawchhung faina min thlen dawn a ni.