Aizawl: Mara Autonomous District Council (MADC)-a Siaha East I bial bye-election result nimin khan chhiar niin, MNF candidate Nelson Khenglawt chu tlinga puan a ni.
September 29, 2023 khan MADC huam chhunga Siaha East I bial chu he biala MDC ni lai a thih avangin by-election neih a ni.
He biala vote tlate hi nimin khan chhiar niin MNF candidate Nelson Khenglawt chuan vote 1,000 hmuin tlinga puan a ni.
Nelson Khenglawt hnaihtu ber hi ZPM candidate Tlanzara Hanglung niin, vote 653 a hmu a. INC candidate F Lallawmawma’n vote 324 hmuin BJP candidate R Laltanpuia’n vote 112 a hmu thung a. NOTA pali a awm bawk.
He inthlana Nelson Khenglawt-in hnehna a chan chungchangah MNF party chuan thuchhuah siamin BJP kaihhruai party rorelna hnuaia Siaha East I biala MNF-in hnehna sang tak an chang thei chu lawmawm an tiin, he bial mai ni lo, Siaha bial chhunga MNF dinhmun thatzia a pholang hlea an ngaih thu leh MLA inthlan lo awm turah pawh he bialah hian hnehna sang tak an chan ngei an rin thu an tar lang.