Minister RKa’n Kawrtethawveng BDO pisa leh quarter hawng

Kawrtethawveng BDO pisa leh BDO Quarters building chu nimin khan Rural Development Minister Lalruatkima’n a hawng.

Hawnna inkhawmah Lalruatkima chuan, RD block thar a pian nan March 25, 2022 khan RD Department chuan cabinet memo siamin, hma a la tan tih a sawi a. Mizo hnam nihna thinlung, ram lokal zel tur, hnam pasaltha te’n an thlah lokal zel tana ram an lo zuah hi hnamdangin an luah ang tih hlauhthawnna tlang atangin, RD Block pahnih Kawrtethawveng leh Tlabung hi a lo piang chhuak ta tih a sawi.

Lalruatkima chuan BDO pisa hawn chu thil hautak tak a nih thu a sawi a. Kawrtethawnveng RD Block ah hian khawtlang hmasawnna piah lamah, Zoram dinhmun ngaihtuahin Kawrtethawvengah hian pal rinawm tak dah a nih loh chuan, Mizo hnam chhuan lo kal zel tur hian eng nge a tawn ang tih ngaihtuahna thui tak a awm niin a sawi.

RD Minister chuan Mizorama mihring cheng zat a pun chak loh avangin, nakinah harsatna hnam ang pawhin a thlen thei tih a sawi a. Ram himna ngaihtuah rengin, hnam tan fahrin manhla ni tura tan lak zel a ngai tih a sawi a. Khawthlang tlangdungah ram lei lung hausakna atangin eizawnna a tam a, chutiang karah tlang dung dang ang bawkin hmasawnna a lo thlen theih nan Kawrtethawveng chhim lam, Nghawngkawl tlanga ram neitu Zahmingthanga te’n a thlawna sorkar an pek avangin lawmthu a sawi a. Kawrtethawveng Block hian post thar panga a keng tel a, nikum 2022 khan tih fel vek a nih tawh a nih thu a sawi bawk.

Joint Secretary V Lalengmawia kaihhruai inkhawmah hian khualzahawm ICT Minister Robert Romawia Royte pawhin thu a sawi a. NABARD kaltlanga sak tur Village Knowledge Center, Kawrtethawveng, lungphum a phum nghal bawk.

January 20, 2023 khan Kawrtethawveng RD Block hi hawn a ni. Kawrtethawveng Block Development Office hi MGNREGS leh MzSLRM hnuaiah Rs.195.75 lakh sengin November 28, 2022 khan sak tan niin, September 30, 2023 khan sak zawh a ni. Mizopa chhiara chawng li a ni.

BDO quarters hi Rs. 98.24 lakh sengin November 28, 2022 khan sak tan a ni a, Septembe 30, 2023 khan sak zawh a ni a. Mizopa chhiara chhawng hnih a ni.

Leave a Reply

error: Content is protected !!