Aizawl: Serlui bialtu MLA Lalrinsanga Ralte-in nimin khan Hmar Student Association (HSA) Rising Day vawi 85-na lawmna a hmanpui a. Ram leh hnam hmasawnna atan Zo hnahthlak hnam peng hrang hrangte an inpumkhat a tul thu a sawi.
Saipum Community Hall-a inkhawm buatsaihah Lalrinsanga Ralte chuan Zofate chu hmun hrang hrangah awm mah se an inlungruala an inpawh zual a tul a ni tiin, Zofate inpumkhatna chu a ngaih pawimawh thu a sawi.
Zirlai kalkhawmte fuihin khawtlang innghahna tur an la nih avangin an nun te uluk a, an zirnaah theihtawp chhuah turin a chah a; zirtirtu hna chu khawvela hna ropui ber te zing a mi a ni a. Zirlai naupang te tan an thiam leh finna te hmang a, an zirlai bakah nungchang mawi, aia upa zahna te zirtir thin turin zirtirtute a fuih bawk.
Serlui bialtu MLA chuan Saipum khuain zirnaa hma an sawn theihna atan a theihna zawng zawng a sen thu leh a rahchhuah pawh a tha zawnga an hmuh zel thu a sawi a. Sorkar school ni tura hlan kai tak, Saipum High School chu HSLC Exam Centre tura dah a nih tawh thu leh kum thar Academic session atanga tan turin Saipum Higher Secondary School (Arts Stream) pawh hawn a nih thu leh school kal tan nghal a nih tur thu a sawi a. Govt Primary School-1, Saipum pawh an school building sak thatna tur work order pawh lak fel a nih tawh thu a sawi bawk.
He hunah hian L.Rothanglien Khawbung, President, HSA Gen Headquarters pawhin thu a sawi a ni.