Aizawl : BJP Mizoramin nimina an party pisa-a chhung inkhawm an hmanah an President Vanlalhmuaka chuan, Mizorama political party te’n an politics khelh chhanah an chiang lo thin niin a sawi.
Mipui Runa chhung inkhawmah Vanlalhmuaka chuan, ram venhimna leh raltlan chungchangah Mizoram chief minister in central minister biak a tum chu hun an neih loh thu an hrilh chuan, BJP Mizoram President a nih angin central minister pahnih hnenah Mizoram chief minister hi MNF chief minister a nih loh thu leh, Mizoram chief minister a nih avang zawngin Mizoram harsatna leh mamawhte a thlen theihna turin hun pe turin a hrilh niin a sawi.
Vanlalhmuaka chuan, hmun hrang hranga Zo hnahthlakte’n harsatna an tawh chuan, a inpuia awm Mizote hian party sawi lovin theihtawp chhuahin an harsatna lak ata chhanchhuah an nihna turin hma an la tur a nih thu sawiin, “Chutiang chu politics kan khelh dan tur a ni. Mizoram CM Pu Zoramthanga hi MNF CM mai a ni lo va, Mizoram aiawh a ni tih hi kan chian tel a ngai a. Ram leh Hnam chungchangah chuan kawikhawm thin ang thapa kan tanrual a ngai thung a ni,” a ti.
Inthlan hun puan a ni ta a, Mizoram mipuiin kum nga chhung atana Mizoram hmalam hun tur chu an kutah a awm tih an hriat a tul tih sawiin Vanlalhmuaka chuan, “Mipui sorkar, party bil emaw, chhungkaw bil emaw, sorkar ni lo vin, mipui tana ding thin leh hnathawk thin sorkar kan neih a ngai,” a ti a. Mizoramin hmasawnna a la hmuh ngai loh, sorkar tawh te atanga mipui beisei thin si chu hmuh theih a nihna turin BJP sorkar a ngai tih a sawi bawk.
He hunah hian BJP zawm thar, MNF General Hqrs Adviser hlui T Lalengthanga pawhin thu a sawi.