Pakistan hmar lamah boruak chhe tak avangin mi tam tak an dam lo va, thuneitute chuan tun kar zawng khawpui inkhar a puan a ngaih phah.
An khawpui lian ber pahnihna, Lahore-ah chuan hlauhawm chhinchhiahna chung lam a ni tawh.
Punjab province sorkar chuan khawpui pathuma sikul, pisa, offices, bazarpui leh park chu Pathianni thleng khar turin a ti a, heng zingah hian Lahore pawh a tel.
Pakistan-a Punjab province hi India-a Punjab nen an inri nghe nghe.
Ni rei vak lo liam ta atang khan Lahore-a Air Quality Index hi 400 bawr velah a awm a. AQI level hi 100 leh a aia hniam a nih chuan a tha pangngai tawk a ni a, a sang hle a. Lahore hi Indian khawpui pakhat, Amritsar nena inhnaih tak a ni.
India hmar lam pawh tun lai hian boruak bawlhhlawh takin a tuam mek.
Indian khawpui, Delhi-ah chuan hlauhawm chhinchhiahna chung a ni mek a. Thawhlehni khan AQI hi 300 kai tanin hlauhawm uchuak tak chin, 301-500 inkar a ni reng tawh.
Lahore-a cheng thenkhat chuan boruak bawlhhlawh an hip luh nasat avang hian an hriselnain a tuar a, an ni tin chet vel a buai phah tih an sawi.
“Boruak hlauhawm tak hi kan nun peng pakhat ang maiin kan ngai tawh a ni,” tiin thil zuar, Ameer Hamza chuan a sawi a, ani hi motorcycle-a nileng lenga tlan kual thin a ni.
“Bungrua zuarin hmun hrang hrangah ka kal kual a, nilenga chhuaha tlaia haw meuh chuan ka mit a sen rum tawh zel a. Ka damloh phah a, ka hna a buai phah a. Tunah pawh ka hnar a ping a, ka hrawk a thip a, ka khuh nasa bawk,” a ti.
Sarah Zeeshan-i pawhin a fanu kum khat leh a chanve mi chu khu a hip luh nasat lutuk avangin thil ei leh in a harsat phah nasa a, a ka a na niin a sawi bawk.
Boruak bawlhhlawh hip lut tam hian hun rei zawkah hrisel lohna tam tam a thlen thei a, chuap lung cancer thlengin a thlen thei.
Mi thiamte chuan thlasik thlai chin nana lo neituten an lo an hal khu nasa lutuk chu boruak a bawlhhlawh chhan lian ber pakhat niin an sawi.
Pakistan hian kar hmasa khan Indian thuneitute pawh a lo dawr tawh a, an inbiakna kimchang erawh an sawi lo.
Mi thiamte chuan India ang bawkin Pakistan-a lo neitute pawhin thlai dang chinna atan an lo an hal nasa ve hle tho niin an sawi.
Punjab-ah hian damdawi in, eichawp dawr leh gas station hawn a ni a. Mi chengte chu pawna an chhuah chuan hmai tuam turin an ti.
University of Chicago-in Air Quality Life Index a tihchhuahah chuan Pakistan-a boruak a bawlhhlawh zualna laia chengte hi kum sarih dawnin an nunna a tawi phah thei niin an sawi a, heng zingah hian Lahore pawh a tel.