India hmarchhak leh Bangladesh inkalpawh awlsam zawkna tura ruahman, ram hnih inkara relkawng siam hna chu kum 2024-ah zawh hman tum a nih thu Union Minister Karen Rijiju chuan a sawi.
Rijiju chuan relkawng siam mek, Agartala, Tripura leh Akhaura, Bangladesh inkar chu peih tep a ni a, hmarchhak leh Bangladesh hi India-in zalenna a neih kum 75-na champha hmain a inkalpawh thei tawh dawn tih a sawi.
Union Minister for Development of North Eastern Region (DoNER) chuan India ram china km 5.46-a thui leh Bangladesh china km 10.6-a thui kawng chu Ministry of External Affairs ruahman ang a nih thu leh he kawng hian Gangasagar, Bangladesh atanga Nischintapur, India leh Nischintapur, Agartala railway station thleng pawhna tur a nih thu a sawi.
Singh chuan Indo-Bangladesh railway-a India lam chin siam nan hian India chuan Rs Vbc 580 a ruahman tih a sawi a. Engineer leh mi thiam zawkten India leilung hi a nem lutuk an tih avangin tun lai thiamna sang ber nena hna thawh a nih thu a sawi bawk.
Hnathawktu mi 600 velin chhun zan zawmin an thawk a. Modi-a sorkar chuan hmarchhak tihhmasawn chu a ngai pawimawh a nih avangin kum nga liam ta chhung pawhin chak taka hna thawh a nih thu a sawi bawk.
“Prime Minister Narendra Modi-a sorkar hian India hmarchhak hmasawnna hi a ngai pawimawh a. Tun hmaa rel la hmu ngai lo Arunachal Pradesh leh Meghalaya-ah pawh rel service-na tura hma lak a ni a. Tunah phei chuan Arunchal Express chu ni tin Itanagar leh Delhi inkarah a tlan reng tawh,” tiin DoNER minister hian a sawi a ni.