Election Commission of India (ECI) ruahmanna angin Aizawl South III bial chhunga Muallungthu mipuiten nimin khan vote an thlak nawn a, vote 87.08% a tla.
November 7,2023-a Mizoram Legislative Assembly inthlanpui neih a nih khan Muallungthu Polling Station-ah hian inthlan hmaa Electronic Voting Machine (EVM) an enchhinnaa vote tlate chu paih fai loin vote thlak nan hman tlang a ni a, hei hi hriat chhuah a nih hnuah ECI ruahmannain vote thlak that tura tih a ni a, nimin khan Muallungthu mipuiten vote an thlak tha leh ta a ni.
Vote thlak thatna hmun tlawhtu The Zozam Times zawhna chhangin Muallungthu Polling Station-a inthlan buaipuitute chuan ruahman lawk angin zing dar 7-a tan chat vote thlak tan theih a ni a, vote thlakna khawl, EVM leh VVPAT-ah harsatna a awm lo tih an sawi a, an beisei aia vote a tlak that thu an sawi a ni.
Boruak tha leh muanawm tak hnuaia vote thlak a nih theih nan venhimna lam uluk taka kalpuiin, police thahnem tak an duty a, boruak tha lo thleng a awm lo a ni.
Vote thlak thatna khua, Muallungthu-ah hian khaw pawn mi inthlan ngaihvena kal an thahnem hle a, party pathum – MNF, Congress leh ZPM hruaitu lawkte pawh an kim deuh vek tih theih a ni.
Muallungthu Polling Station-ah hian hmeichhe vote nei 548 leh mipa vote nei 536, an vaiin vote nei mi 1,084 an awm a. Vote thlaktute hi mipa 460 leh hmeichhia 484 an ni a, vote tla zawng zawng chu 944, za zela 87.08 a ni.
Aizawl South III bialah hian candidate pali MNF candidate Dr F Lalnunmawia, Congress Rosiamngheta, ZPM Candidate Baryl Vanneihsangi leh Lalpa chhiah hlawh intelkhawm atangin Independent candidate Rev Dr Zaichhawna Hlawndo te an awm a ni.
Candidate-te hian beiseina an neih san thu leh tlin ngei an in beisei thu an sawi hlawm vek a ni.