India hmarchhak huang chhunga intihhlimna leh kût ropui ber pakhat. Kohima Chamber of Commerce & Industries (KCCI)-in kum tina an buatsaih thin, International Hornbill Festival of Nagaland an tih chu a hun a thleng leh hnai ta a. Kumin erawh kum dang ang lo deuhvin a ni dawn a, he kûtpuiin a ken tel pakhat, ‘Hornbill Night Carnival’ chu plastic tel lova hman a ni dawn tih a buatsaihtute chuan an puang.
Hornbill Festival an tih mai thin hi December 1-10 inkarin kum tin hman thin a ni a. State sorkarin khualzinte hip khawp nana kum tina a buatsaih thin a ni a, an tum ang ngeiin khualzin pawhin an bawh a, kûtpui hlawhtling tak tak an lo hmang tawh thin.
Kuminah hian plastic lam chi thil reng reng bakah ram leilung tichhe thei ang hmanrua hrim hrim hman an phal dawn lo va. An phal loh tur zingah hian mineral water bottle leh thermocol te pawh a tel dawn niin KCCI president Medozhatuo Rutsa chuan a sawi.
Plastic lam chi engmah hman phal a nih dawn loh avang hian a thlakna tur an ngaihtuah ve thung a. KCCI leh Kohima Municipal Council chuan lehkha hmanga siam paper bag-te an ngaihtuah vek dawn a, thil ei leh in lam tihna hmanrua atan pawh sil mai theih tur chi zawk an hmang dawn tih an sawi bawk a. Plastic lo hmang lui man an awm chuan hremna pawh an pe dawn bawk a ni.
Zan 10 zet awh tur, night carnival hi tlai dar 6:00 atanga tanin zan dar 9:00 thleng, Phoolbari junction leh Razhu Point inkarah hman a ni ziah dawn a ni.
Kumin kutpui hman tur atan hian inbuatsaihna chak takin an kalpui mek a. Stall hawng duhte tan dilna chu nimin khan lak chhuah theih a ni a, November 22 thleng thehluh leh theih niin November 24-ah a hawng thei turte hi puan an ni ang.